Mal sharýashylyǵyn damytýǵa jáne qazaqtyń jylqy sharýashylyǵy dástúrin saqtaýǵa baǵyttalǵan joba sheńberinde Aqtóbe oblysynda júrgizilip jatqan «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» ǵımaratynyń qurylysy 2026 jylǵy mamyr aıynda aıaqtalyp, paıdalanýǵa beriledi dep kútilip otyr, dep jazady Egemen.kz.
«Qazaq ǵylymı-zertteý jylqy sharýashylyǵy ınstıtýty ótken jyly Memleket basshysynyń tapsyrmasymen ashyldy. Bir jyldan az ýaqyt ishinde burynǵy tájirıbe stansasy ǵylymı-zertteý mekemesine aınaldy. Qazirgi ýaqytta zamanaýı ǵımarattyń qurylysy júrgizilip jatyr, onyń quramynda asyl tuqymdy jylqylardy jan-jaqty zerdeleýge arnalǵan bes zerthana qarastyrylǵan. Instıtýttyń negizgi mindetteri – jylqy eti men qymyz eksportyn damytý, ulttyq sport túrlerin nasıhattaý jáne sporttyq jylqy sharýashylyǵyn órkendetý. Sondaı-aq otandyq shabandozdardyń halyqaralyq jarystarǵa qatysýyna jaǵdaı jasaý josparlanyp otyr», dedi «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» aksıonerlik qoǵamynyń basqarma tóraǵasy Álibek Bazarǵalıev.
Aýyl sharýashylyǵy mınıstrliginiń málimetinshe ınstıtýt qurylymynda manej, at qoralar, veterınarııalyq pýnkt, zerthanalar jáne ıppodrom qarastyrylǵan. Bul keshen ǵylymı zertteýler júrgizýge, praktıkalyq jumystar atqarýǵa jáne jylqy sharýashylyǵy salasyndaǵy mamandardy daıarlaýǵa múmkindik beredi.
Keler jyly qurylysy aıaqtalatyn jobany iske asyrý salanyń ǵylymı negizin nyǵaıtyp, asyl tuqymdy jumystardyń sapasyn arttyrýǵa jáne elimizdiń jylqy sharýashylyǵyn jańa deńgeıge kóterýge múmkindik beredi.