Soltústik Qazaqstan oblysy Polısııa departamenti bastyǵynyń birinshi orynbasary Asqar Muhametqalıev jyl basynan beri polısııa 770 kg esirtki tárkilegenin málimdedi. Bul kórsetkish – byltyrǵydan artyq. Bıylǵy 9 aıda esirtkige qatysty 214 qylmys tirkelgen bolsa, byltyr bul san 187 bolǵan edi. Tirkelgen qylmystardyń 100-den astamy – satý faktileri.
«Julynqurttyń» jastar arasynda jaıylyp bara jatqany belgili bolyp otyr. Jeńil aqsha tabýdy kóksegen jastar esirtkini ózi qoldanbasa da zıp-qaltashalarǵa bólgeni úshin ǵana birneshe jyl ómirin qapasta ótkizýge májbúr bolady. О́ıtkeni zańǵa sáıkes, bul – aýyr qylmys.
Oblysta 9 aıda ǵana iri kólemde esirtkini jasyrý faktileri 7 ret ashyldy. Sondaı-aq 7 ret kontrabandalyq jolmen oblys aýmaǵyna ótkizilgen esirtki trafıgi anyqtalǵan. Esirtkini jarnamalaǵany úshin 4 ret qylmystyq is qozǵalǵan.
Osy merzim ishinde oblystyń esirtkige qarsy kúres basqarmasynyń qyzmetkerleri 10 fıtonarkozerthanany áshkerelep, shamamen 800 kılo esirtki quraldaryn tárkilegen. Onyń ishinde 5 kıloǵa jýyq sıntetıkalyq esirtki jáne 700 kılodan astam marıhýana bar.
Esirtkige qarsy kúreste oblys pınkertondary óńirge esirtki jetkizetin 7 arnany anyqtap, jolyn kesti. Máselen, 7 sáýirde qalaǵa kireberiste «Daewoo Nexia» avtokóligi toqtatylyp, ony júrgizgen 26 jastaǵy astanalyq turǵynnan jarty kıloǵa jýyq sıntetıkalyq esirtki tabyldy. Sot ony 7 jylǵa bas bostandyǵynan aıyrý jazasyna kesti. Sondaı-aq Petropavl qalasyna 20 qyrkúıekte kelgen 22 jastaǵy Astana turǵynynan erekshe iri kólemdegi psıhotroptyq zattar tabyldy. Tárkileý barysynda onyń mashınasynan mefedronnyń analogi bar 34 túıinshek tabyldy. Sonymen qatar jaldamaly páterinen taǵy 60 túıinshek shyqty. Barlyǵy 104 gramm bolǵan osynaý sıntetıkalyq esirtki júzdegen «qaltasha» túrinde taratylýy múmkin edi. Jedel ustaýdyń nátıjesinde ǵana qala aýmaǵynda esirtkiniń keń taralýyna jol berilmedi.
Jýyrda osy jyldyń basynda ustalǵan Petropavldyń 32 jastaǵy turǵynyna sot bolyp, 7 jylǵa bas bostandyǵynan aıyryldy. Ol ınternet arqyly jasalǵan «jeńil tabys» tabýdyń joldary týraly habarlandyrýǵa qyzyǵyp, sıntetıkalyq esirtki satýmen aınalysatyn onlaın-dúkenderdiń birinde «oraýshy» bolyp jumys isteı bastaǵan. Kýratorynyń tapsyrmasymen ol jasyrynǵan jerlerdegi iri kólemdegi esirtkilerdi ýaqtap, nashaqorlarǵa satý úshin zıp-qaltashalarǵa bólip otyrǵan. Kýratory mundaı isti qaýipsiz dep uqtyrǵan. Alaıda 32 jastaǵy azamat esirtkimen baılanysty istiń bári qylmys ekenin bilmeı qalýy múmkin emes-ti. Aqyrynda ol Petropavldyń shetki aımaqtarynyń birinde ustaldy. Jaldamaly páterinen jedel ýákilder 200 gramnan asa mefedron jáne α-PvP zaty bar paketterdi tárkiledi. Sonymen qatar kúdiktige arnalǵan jasyryn qoımadan jarty kılodan asa sıntetıkalyq esirtki tabyldy. Bul jyl basynan beri Soltústik Qazaqstan oblysynda tárkilengen sıntetıkalyq esirtkiniń eń iri partııalarynyń biri boldy.
Jyl basynan beri SQO-da esirtki satý kúdigimen 40-tan asa adam ustaldy, olardyń 36-sy – 25 jasqa deıingi jastar. Erekshe iri kólemde esirtki satý 7 jyldan 12 jylǵa deıin bas bostandyǵynan aıyrý jazasyn qarastyrady.
Qazir polıseıler stýdentter men joǵary synyp oqýshylary arasynda turaqty túrde profılaktıkalyq jumystar júrgizip keledi. 40 myńnan asa jasóspirimder men stýdentter 700-den asa aqparattyq, sporttyq jáne kreatıvti is-sharalarǵa qatysty.
PETROPAVL