2024 jylǵy 1 qańtardan bastap jumys berýshiler mindetti 10%-dyq zeınetaqy tóleminen bólek, óz qarajaty esebinen jumysshynyń Biryńǵaı jınaqtaýshy zeınetaqy qoryndaǵy shotyna qosymsha jarna aýdarýǵa mindettelgen. Alǵashqy jyly zeınetaqy jarnasynyń mólsheri jalaqynyń 1,5%-yn qurasa, 2028 jylǵa deıin kezeń-kezeńimen 5%-ǵa deıin kóteriledi. Búgin Májilis kýlýarynda depýtat Ashat Aımaǵambetov sol 5%-dyń 4%-yn azamattardyń jeke shotyna aýdarý usynysyn tarqata aıtty, dep jazady Egemen.kz.
Bastapqy jospar boıynsha jumys berýshiniń óz qarajaty esebinen jumysshynyń Biryńǵaı jınaqtaýshy zeınetaqy qoryndaǵy shotyna 2024 jyly – 1,5%, 2025 jyly – 2,5%, 2026 jyly – 3,5%, 2027 jyly – 4,5%, 2028 jyly – 5,0% aýdarý mindeti qoıylǵan.
Májilismen A.Aımaǵambetov qarjy sarapshylarynyń pikirlerin alǵa tarta otyryp, atalǵan 5%-dyń 4%-yn azamattardyń jeke shotyna aýdarý usynysyn kótergenin jetkizdi.
«Qazir Biryńǵaı zeınetaqy qoryna árqaısysymyzdyń jalaqymyzdan 10% aýdarym mindetti túrde jasalady. Byltyr jumys berýshiler de óz qarajatynan aýdarym jasaýǵa mindetteldi. Endi biz jáne qarjygerler osy qosymsha jumys berýshilerdiń tóleıtin 5%-ynyń 4%-yn ár adamnyń jeke shotyna berse deımiz. 1%-yn jalpy qorǵa aýdarýdy usynamyz. О́ıtkeni elimizde jalaqy almaıtyn azamattar da bar. Olarǵa da zeınetaqy tólenýi kerek. Máselen, qazir siz BAQ-ta qyzmet etip júrseńiz ár jalaqyńyzdyń 10%-y BJZQ-ǵa aýdarylyp jatyr. Oǵan jumys berýshiniń 5%-y da qosylady. Joǵaryda aıtqan pikirimizdi burynǵy Ulttyq bank qyzmetkerleri, tóraǵalary da qoldap otyr. Meniń de jeke pikirim osy ustanymǵa saıady», dedi depýtat.