Jer aıaǵy keńip, sýdyń tartylǵandyǵy týraly qýanyshty habardy Nuh paıǵambardyń kemesine kógershin jetkizgen kórinedi. Bizdiń de kemedeı elimiz jańa astana izdep tarıh tolqynynda qaırańdaǵan kezinde óziniń alǵashqy kógershinderin jiberdi. Olardyń ishinde qazirgi Elordamyzdyń mádenıetin kóterýge erekshe eńbek etken ónerpazdar bar edi. Olar – kúıshi Anar Muzdahanova men qobyzshy Janar Júsipova.
Kúıshilermen kezdesý L.N. Gýmılev atyndaǵy Eýrazııa ulttyq ýnıversıtetinde ótti. «Káýsar» mádenı-tanymdyq birlestiginiń yjdaǵatymen ótken keshte kúmbirlep kúı tógildi, áserli áńgime aıtyldy. Áýelgi sózdi birlestik jetekshisi, ánshi, elimizdiń eńbek sińirgen ártisi Kenjeǵalı Myrjyqbaı aıtty.
«1996 jyly Almatydaǵy Abaı atyndaǵy opera jáne balet teatrynyń ánshisi bolyp qyzmet istep júrgenimde gastroldik saparmen Aqmolaǵa bardym. «Dvores selınnıkovte» jeke konsertimdi ótkizip aýdandaryn aralap júrgenimde 23 mamyrda SISI men Pedagogıka ınstıtýtyn qosyp L. N. Gýmılev atyndaǵy Eýrazııa ulttyq ýnıversıtetin qurý týraly prezıdent jarlyǵy shyqty. Onyń rektory bolyp taǵaıyndalǵan Amangeldi Qusaıynov jańadan qurylǵan ýnıversıtettiń mýzykalyq fakýltetine arnaıy shaqyryp, Mádenıet mınıstri Talǵat Mamashovqa meni ýnıversıtetke aýystyrý jóninde ótinish hatyn jazyp berdi», dedi Kenjeǵalı Myrjyqbaı.
Osy kezde Aqmolaǵa ár salanyń úzdikteri qonys aýdaryp, Almatydaǵy zııaly qaýymdy teriskeıge shaqyrdy. Ýnıversıtettegi qazaq ádebıeti kafedrasynyń meńgerýshisi bolyp taǵaıyndalǵan Dıhan Qamzabekuly ǵalymdardyń ishinen alǵashqylardyń biri bolyp kóship kelip, Rymǵalı Nurǵalıev, Seıit Qasqabasov, Serik Negımov, Myrzataı Serǵalıev qatarly zııaly qaýym ókilderin jınady. Osy kezde qyryqtaǵy talantty ánshi Kenjeǵalı Myrjyqbaı da óz salasynyń myqtylaryn jınaý kerek dep túıedi. Oblystyq fılarmonııanyń dırektory ári kórkemdik jetekshisi bolyp taǵaıyndalǵan ol birden jer-jerden ónerpazdardy izdestiredi.
«Kásibı mýzykalyq bilimi bar mamandar óte az, qalada ótetin mádenı is-sharalar men konsertterde halyqtyq ónerge oryn joq. Ulttyq talǵamnan alystaǵan jergilikti eldiń án men kúıdi uǵyna almaıtyndary beseneden belgili. Sondyqtan qalany qazaqylandyrý úshin birden ult aspaptar orkestrin qurý máselesin kún tártibine qoıdyq. Bolashaq astanamyzǵa birinshi bolyp kelgen ónerpazdardyń ishinde dombyrashy Anar Muzdahanova men qobyzshy Janar Júsipova boldy», dedi Kenjeǵalı Myrjyqbaı.
Kezdesý barysynda eki ónerpaz halyq kompozıtorlarynyń shyǵarmalary men qatar ózderiniń avtorlyq týyndylaryn kezektese tógiltip oryndady. Atap aıtsaq, Anar Muzdahanovanyń ult ardaqtysy Mirjaqyp Dýlatulynyń rýhyna arnalǵan «Oıan, qazaq!» kúıi men Janar Júsipovanyń «Aqqý-qazdar» hám «Turan» atty tól shyǵarmalary kópshilik kóńilin súısintti.
Fılologııa ǵylymdarynyń doktory, professor Serik Negımov toqsanynshy jyldardyń tolǵaqtarynda eldigimizdi bekemdep, eńsemizdi tiktegen óner qaıratkerlerin erekshe atap ótti.
«Halyqtyń mádenı murasyn nasıhattaýshylar resmı sahnalarda ǵana emes, aýyl eńbekkerlerine, shopandarǵa, eginshilerge ózderi baryp konsert qoıdy. Osyndaı ónerpazdardyń eren eńbegi arqasynda halqymyz óziniń egemendigin shynaıy sezindi. Olardyń ishinde kórkem ónerdiń kógershinderi – Anar men Janardyń úlesi zor. Ásirese, Aqmola oblysynyń mádenıetine jasaǵan jumystary úshin bul ónerpazdar qandaı qurmetke de laıyq», dedi Serik Negımov.