ASTANA. 21 naýryz. Shveısarııanyń Non qalasynda Chempıondar lıgasynyń shırek fınaly úshin jerebe tartý rásimi ótti. Nátıjesinde, Madrıdtiń qos komandasy «Real» men «Atletıko» taǵy da qarsylas atanyp otyr. Sondaı-aq, Parıjdiń PSJ-sy «Barselonamen» jartylaı fınaldyń joldamasyn sarapqa salady. Bul týraly egemen.kz habarlady.
Sonymen Chempıondar lıgasynyń shırek fınalynda myna komandalardyń oıynyn kóremiz:
PSJ – «Barselona»;
«Atletıko» – «Real»;
«Portý» – «Bavarııa»;
«Monako» – «Iýventýs».
Shırek fınaldyń alǵashqy oıyndary 14-15 sáýirde ótedi. Al qarymta kezdesýler 21-22 sáýirge josparlanǵan.
О́tken maýsymnyń fınalynda «Real» «Atletıkony» 4:1 esebimen jeńgeni esimizde. Negizgi ýaqyttyń sońǵy mınýtyna deıin 0:1 esebimen jeńilip turyp, sheshýshi sátte ǵana Serhıo Ramos tarazy basyn teńestirdi. Al qosymsha eki kezeńde Karlo Anchelottıdiń shákirtteri qarsylastaryn júndeı tútti. 90 mınýt boıy sala almaǵan goldaryn osy 30 mınýttyń ishinde qarsha boratqan «Real» oıynshylary naǵyz fınalǵa laıyq oıyn kórsetken bolatyn. Qosymsha kezeńde Garet Beıl, Marselo jáne Krıshtıaný Ronaldýlar mergendigimen kózge tústi.
Sol fınaldyq oıynnan keıin qos komanda Ispanııa chempıonaty, Sýperkýbok jáne Ispanııa kýbogy jarystarynda alty ret kezdesti. Sonyń birde birinde «Real» jeńiske jetip kórgen joq. Tórt oıynda «Atletıko» basym tússe, eki match teń aıaqtaldy.
Madrıdtiń qos komandasy eýrokýbok básekelerinde osymen úshinshi ret kezdesip otyr. Onyń bireýi byltyrǵy fınaldyq oıyn. Al alǵashqysy 1958-1959 jylǵy sol kezdegi Eýropa chempıondary kýbogynyń jartylaı fınalynda tirkeldi. Eki oıyn qorytyndysy boıynsha jalpy esep teń aıaqtalyp (2:2), qaıta oınalǵan matchta «Real» 2:1 esebimen jeńiske jetken edi.
PSJ men «Barselonanyń» bıylǵy maýsymda bir topta bolǵanyn bilemiz. Sol synda Parıjdiń komandasy óz alańynda 3:2 esebimen jeńse, syrt alańdaǵy oıynda 1:3 esebimen ese jiberdi.
Sondaı-aq, qos komanda 2012-2013 jylǵy maýsymnyń shırek fınalynda da bir-birine qarsylas atanǵan edi. Eki oıyn nátıjesi 3:3 esebimen teń aıaqtalsa da, syrt alańda soqqan golynyń septigimen jarysty «Barselona» jalǵastyrdy. Al 1997 jyly atalǵan qarsylastar Kýboktardyń kýbogy jarysynyń fınalynda kezdesti. Rotterdamda ótken sol oıynda Katalonııanyń komandasy 1:0 esebimen jeńiske jetti. Jalǵyz goldyń avtory Brazılııanyń dańqty oıynshysy Ronaldo bolǵanyn aıta keteıik.
«Portý» 1987 jyly Eýropa chempıondary kýbogynyń fınalynda «Bavarııamen» oınap, 2:1 esebimen jeńgen. Al mıýnhendikter basty eýrokýbok básekesiniń shırek fınalynda «Portýdy» eki ret aınalyp ótken. Alǵashqysy 1990-1991 jyly tirkelse (jalpy esep 3:1), ekinshisi 1999-2000 jylǵy maýsymda boldy. Ol kezde qos oıynnyń nátıjesi boıynsha «Bavarııa» 3:2 esebimen basym túsken bolatyn.
Chempıondar lıgasynyń 1997-1998 jylǵy maýsymynda jartylaı fınalda «Iýventýs» «Monakony» jarystan shyǵarǵany belgili. Alǵashqy oıynda Týrınniń komandasy qarsylastaryn 4:1 esebimen tas-talqan etse, qarymta kezdesýde 2:3 esebimen ese jiberdi.
Chempıondar lıgasynyń bıylǵy fınaly 6 maýsymda Berlındegi «Olımpıashtadıon» stadıonynda ótedi. Jartylaı fınaldyń jerebesi 24 sáýirde tartylyp, oıyndar 5-6 jáne 12-13 mamyrda ótedi dep kútilýde.
Elaman Qońyr.
Derek: egemen.kz.
Sýret: uefa.com.