Bıyl jyl basynan beri 10 aıda 25,5 myń múgedektigi bar adam jumyspen qamtyldy. Elimizde erekshe qajettilikteri bar 111 myń adam turaqty eńbek etedi. Jumys isteı alatyn múgedektigi bar adamdardyń 30%y «eki qolǵa bir kúrek» taýyp otyr.
Statıstıkalyq derekke súıensek, elimizde múgedektigi bar 743,9 myń adam turady, ıaǵnı halyqtyń 3,7%-y. Olardyń ishinde 375,2 myń azamat eńbekke qabiletti jasta. Áleýmettik kodekske sáıkes jergilikti atqarýshy organdar múgedektigi bar adamdardy aýyr jumystarǵa, eńbek jaǵdaılary zııandy, qaýipti jumystardaǵy jumys oryndaryna jibermeıdi. Kerisinshe, jumysshylardyń jalpy sanynyń (jaldamaly jumyskerlerdiń jalpy sany keminde 50 adam bolǵan kezde) 2-4%-yna deıingi kólemde jumys oryndaryna kvota belgileıdi. Bıylǵy úshinshi toqsanda kvota bólý arqyly múgedektigi bar 7,1 myń adam jumysqa ornalastyryldy.
Erekshe qajettilikteri bar adamdar jumyspen qamtýǵa járdemdesýdiń belsendi sharalaryna da qatysady. Bıylǵy 1 qarashaǵa deıin turaqty jumysqa – 4,8 myń, jastar praktıkasyna – 538, áleýmettik jumys oryndaryna – 538, qoǵamdyq jumystarǵa – 5,7 myń, «Kúmis jas» jobasymen – 758, «Alǵashqy jumys ornyna» – 120, «Urpaqtar kelisimsharty» aıasynda 9 adam jumysqa ornalastyryldy.
Qysqa merzimdi kásiptik oqytýmen 277 adam bilimin shyńdasa, «Bastaý bıznes» jobasy aıasynda kásipkerlik negizderin 4,5 myń múgedektigi bar azamat meńgergen. Halyqtyń áleýmettik osal toptaryna jatatyn azamattarǵa óz bıznesin ashýǵa 400 AEK-ke deıingi (1,6 mln teńge) mólsherinde memlekettik granttar beriledi. Jeke kásibin ashamyn degen 1,4 myń múgedektigi bar adam osyndaı qoldaýǵa ıe boldy.
2018 jyldan bastap halyqaralyq tájirıbe negizinde múgedektigi bar adamdardy jumysqa ornalastyrý maqsatynda arnaıy jumys ornyn ashýdyń shyǵyndaryn sýbsıdııalaý tártibi engizildi. Bıyl osyndaı 87 arnaıy jumys orny quryldy.