Qostanaı oblysynyń Jangeldın aýdanynda brakonerlik jasady degen kúdikpen úsh adam ustaldy. Polısııa olardyń avtokóliginen zańdastyrylmaǵan myltyq, janýardyń qylshyǵy jabysqan pyshaq tapqan. Sondaı-aq, jaqyn mańnan oqqa ushyp ólgen aqbókenniń denesi tabylǵan, dep jazady Egemen.kz.
Atalǵan oqıǵaǵa qatysty Qylmystyq kodekstiń 339-1-baby boıynsha qylmystyq is qozǵaldy.
«Oqıǵa «Brakoner» respýblıkalyq jedel aldyn alý is-sharasy aıasynda tirkeldi. 20 qazannan 19 qarashaǵa deıin el kóleminde ótip jatqan is-shara barysynda tek Qostanaı oblysynyń ózinde 800-ge jýyq reıd ótkizildi.
Nátıjesinde 150 quqyqbuzýshylyq anyqtaldy, onyń 78-i – ańshylyq erejesin, 28-i – balyq aýlaý tártibin buzýǵa qatysty. Brakonerlerge qarsy kúres jalǵasady. Al elimizdiń tabıǵı baılyǵyna qol suqqan árbir adam zań aldynda tıisti jazasyn alady», dep málimdedi oblystyq PD-nyń baspasóz qyzmeti.
Qostanaı oblysy