ASTANA. 21 naýryz. Búgin fýtboldan Qazaqstan premer-lıgasynyń 4-týr oıyndary ótýde. Ázirge eki oıynnyń nátıjesi belgili. «Taraz» óz alańynda «Qaıratty» jeńse, Pavlodarda «Ertis» pen «Tobyl» teń oınady. Bul týraly egemen.kz habarlady.
«Taraz» (Taraz) – «Qaırat» (Almaty) 1:0
Gol: Aleksandr Pıshýr 29.
Oıyndaǵy jalǵyz gol 29-mınýtta soǵyldy. Jaqyp Qojamberdiden pas alǵan Aleksandr Pıshýr «Qaırat» qaqpashysy Vladımır Plotnıkovtan aılasyn asyrdy. Bul «Tarazdyń» bıylǵy maýsymdaǵy alǵashqy jeńisi. Al «Qaırat» úshin birinshi jeńilis.
Aıta keteıik, matchtyń 16-mınýtynda qonaqtardyń bas jattyqtyrýshysy Vladımır Vaıss oıynshy almastyrýǵa májbúr boldy. «Taraz» fýtbol mektebiniń túlegi Baýyrjan Baıtananyń ornyna Vaıss myrza Isael da Sılvany shyǵardy.
Kelesi týrda «Taraz» syrt alańda «Ordabasymen» oınasa, «Qaırat» Kókshetaýdyń «Oqjetpesin» qabyldaıdy. Bul oıyndar 5 sáýirge josparlanǵan.
«Ertis» (Pavlodar) – «Tobyl» (Qostanaı) 1:1
Goldar: Grıgorıı Sartakov 2 – Sergeı Moshnıkov 93.
Pavlodardaǵy oıyn asa tartysty ótti. Kezdesýdiń 2-mınýtynda-aq alań ıeleri alǵa shyqty. Arıstıd Banse bergen pasty tıimdi paıdalanǵan Grıgorıı Sartakov komandasyn alǵa shyǵardy. Alǵashqy gol kezdesýdiń basynda soǵylsa, jankúıerler ekinshi golǵa oıynnyń sońynda kýá boldy. Tóreshi qosqan qosymsha ýaqytta «Tobyl» oıynshysy Sergeı Moshnıkov komandasyn jeńilisten qutqaryp qaldy.
Bul «Ertistiń» osy maýsymdaǵy úshinshi teń oıyny. Al «Tobyl» osyǵan deıin bir márte qarsylasymen upaı bólisken edi. Kelesi týrda pavlodarlyqtar Taldyqorǵanda jergilikti «Jetisýmen» kúsh synasady. О́z kezeginde «Tobyl» Qostanaıda «Shahterǵa» qarsy alańǵa shyǵady.
Dál qazir premer-lıganyń qalǵan tórt oıyny ótýde. «Aqtóbe» óz alańynda «Ordabasymen» oıyn ótkizýde. Ázirge esep ashylǵan joq. Al Atyraýda «munaıshylar» «Astanamen» teń oınaýda (1:1). Sondaı-aq, Kókshetaýda ótip jatqan «Oqjetpes» pen «Jetisý» arasyndaǵy oıynda alań ıeleri alda keledi (1:0). Qyzylordanyń «Qaısaryn» qabyldap jatqan «Shahter» ázirge 0:1 esebimen ese jiberýde.
Elaman Qońyr.
Derek: egemen.kz.
Sýret: fc-tobol.kz.