ASTANA. 21 naýryz. Búgin fýtboldan Qazaqstan premer-lıgasynyń 4-týr oıyndary ótti. Týr barysynda «Oqjetpes» qatarynan úshinshi jeńisine jetse, «Tobyl» maýsymdaǵy alǵashqy golyn soqty. Bul týraly egemen.kz habarlady.
Týrdyń basty oıyny retinde jankúıerler «Aqtóbe» men «Ordabasy» arasyndaǵy matchty atady. Desek te, bul oıynda esep ashylǵan joq. Al birneshe jyl úzilisten soń premer-lıgaǵa qaıta qosylǵan Kókshetaýdyń «Oqjetpesi» ázirge namysty qoldan bermeýde. Taıaýda Reseıden esimi belgili Dmıtrıı Sychevti aldyrǵan kókshetaýlyqtar búgin jańa fýtbolshysynyń tomaǵasyn sypyrdy. Komandanyń bas jattyqtyrýshysy Vladımır Muhanov reseı fýtbolshysyn matchtyń 78-mınýtynda Aleksandr Pavlovtyń ornyna alańǵa shyǵardy. Jankúıerlerdiń nazaryn aýdarǵan oıyn «Oqjetpestiń» jeńisimen aıaqtaldy.
Osydan eki jyl buryn Eýropaǵa qazaq fýtbolynyń qalybyn kórsetip, jankúıerlerdiń ystyq yqylasyna bólengen «Shahterdiń» búginde hali múshkil. Tórt oıynda bir ǵana upaıǵa ıe bolǵan «kenshiler» qazir týrnır kestesiniń sońynda keledi.
Týr qorytyndysy boıynsha barlyǵy 10 gol soǵyldy. Sonyń ekeýi qazaq fýtbolshysynyń atyna jazyldy. Mergendigimen kózge túsken qaragózder – Maqsat Baıjanov («Atyraý») pen Álibek Bóleshev («Oqjetpes»).
Búgingi oıyndardyń nátıjeleri:
«Taraz» (Taraz) – «Qaırat» (Almaty) 1:0 (1:0)
Gol: A.Pıshýr 29.
«Ertis» (Pavlodar) – «Tobyl» (Qostanaı) 1:1 (1:0)
Goldar: G.Sartakov 2 – S.Moshnıkov 93.
«Atyraý» (Atyraý) – «Astana» (Astana) 1:1 (0:0)
Goldar: M.Baıjanov 62 – A.Grıgorev 56 (avtogol).
«Oqjetpes» (Kókshetaý) – «Jetisý» (Taldyqorǵan) 2:0 (0:0)
Goldar: L.Rotkovıch 68, Á.Bóleshev 75.
«Shahter» (Qaraǵandy) – «Qaısar» (Qyzylorda) 1:2 (0:1)
Goldar: M.Topchagıch 70 – P.Dımov 44, E.Iýnýzovıch 88.
«Aqtóbe» (Aqtóbe) – «Ordabasy» (Shymkent) 0:0
Úzdik mergender:
Jerar Goý («Qaırat») – 4 gol
Roher Kanıas («Astana»), Maqsat Baıjanov («Atyraý») – 3 gol
Patrık Tvýması («Astana») – 2 gol.
5-týr oıyndary 5 sáýirde ótedi:
«Qaırat» – «Oqjetpes»
«Jetisý» – «Ertis»
«Tobyl» – «Shahter»
«Qaısar» – «Atyraý»
«Astana» – «Aqtóbe»
«Ordabasy» – «Taraz»
Elaman Qońyr.
Derek: egemen.kz.
Sýret: i-news.kz.