Qazaqstan men О́zbekstan elderi bilim men ǵylym salasyndaǵy birlesken jumys keleshegin, jastar arasynda qarym-qatynas ornatý máselelerin nazardan tys qaldyrǵan emes. Prezıdent Qasym-Jomart Toqaev Qazaqstan men О́zbekstan arasyndaǵy Joǵary memleketaralyq keńestiń ekinshi otyrysynda bul baǵyttaǵy aıtarlyqtaı ilgerileýdiń jarqyn úlgisi retinde byltyr eki eldiń joǵary oqý oryndarynyń fılıaldary ashylǵanyn atap ótti.
Fılıaldardyń ashylýy Qazaqstan Prezıdenti Qasym-Jomart Toqaev pen О́zbekstan Prezıdenti Shavkat Mırzııoevtiń dıplomatııalyq ınstıtýttyń qurylǵanyna 30 jyl tolýyna oraı kezdesýiniń qorytyndysy boıynsha jasalǵan kelisim negizinde júzege asyryldy. Qos memleket arasyndaǵy qarym-qatynastar memleket basshylarynyń kelissózderiniń nátıjesinde «Jol kartasy» ázirlendi. Eki eldiń vedomstvolyq mınıstrlikteri deńgeıinde Shyrshyq qalasynda fılıal ashý týraly úshjaqty kelisimge qol qoıylǵan edi. Osylaısha, О́zbekstannyń Shyrshyq qalasynda Muhtar Áýezov atyndaǵy Ońtústik Qazaqstan memlekettik ýnıversıtetiniń fılıaly ashyldy. Al Almatyda Tashkent ırrıgasııa jáne aýyl sharýashylyǵyn mehanıkalandyrý ınjenerleri ınstıtýtynyń fılıaly jumysyn bastady.
Joǵary oqý orny fılıaldarynyń ashylýy eki eldiń ǵylym-bilim salasyndaǵy yntymaqtastyǵyn arttyrady. Bul strategııalyq ıdeıanyń júzege asýyna Ońtústik Qazaqstan zertteý ýnıversıteti rektory qyzmetin atqaryp júrgen kezde erekshe úles qostym. О́zbekstanǵa issaparmen birneshe ret baryp, fılıal ashý máselesin kóterip, kelissózder júrgizdik. Shyrshyq – О́zbekstannyń ónerkásibi damyǵan, qazaqtar kóp shoǵyrlanǵan qalasynyń biri. Bul óńirde hımııa ónerkásibi, mashına jasaý, metall óńdeý sııaqty sala qarqyndy damyǵan. Aldaǵy ýaqytta fılıal ókildikterin О́zbekstannyń Qashqadarııa jáne Syrdarııa aýdandarynda ashýdy kózdep otyrmyz.
Darııa QOJAMJAROVA,
M.Áýezov atyndaǵy Ońtústik Qazaqstan ýnıversıteti О́zbekstan Respýblıkasy
Shyrshyq qalasyndaǵy fılıalynyń dırektory