Saýd Arabııasynyń Er-Rııad qalasynda ótip jatqan Islam yntymaqtastyǵy oıyndarynda taekvondodan Baýyrjan Hasenov kúmis medal ıelendi. 82 kg salmaqta synǵa túsken jerlesimiz fınaldyq saıysta ózbekstandyq Marat Mavlonovtan asa almady. Al Nurbek Ǵazez (67 kg) qola medal oljalady.
• Elimizde short-trekten tuńǵysh ret álem chempıonaty ótkizilmek. 2027 jyly jasóspirimder arasyndaǵy jahandyq dodany uıymdastyrý elimizge buıyrdy. Bul – elimizdiń ulttyq konkı sporty tarıhyndaǵy eń eleýli doda bolmaq. Týrızm jáne sport mınıstri Erbol Myrzabosynov Astanaǵa jumys saparymen kelgen Halyqaralyq konkıshiler odaǵynyń (ISU) konkımen júgirý sporty jónindegi dırektory Hýgo Herrnhofpen kezdesýde aqjoltaı jańalyq aıtyldy. Hýgo Herrnhof «Alaý» muz saraıynyń ınfraqurylymyn, buǵan deıingi dúbirli dodalardyń joǵary deńgeıde uıymdastyrylǵanyn, otandyq sportshylarymyzdyń áleýetin joǵary baǵalap, ISU baǵdarlamalary aıasynda Qazaqstanmen tyǵyz yntymaqtastyqty jalǵastyrýǵa daıyn ekenin jetkizdi.
• Úndistanda bokstan álem kýboginiń qorytyndy kezeńi ótip jatyr. Áıelder arasyndaǵy synda Aqbota Bolat (48 kg) birinshi jekpe-jeginde úndistandyq tájirıbeli boksshy Mınakshı Mınakshıge ese jiberdi. Erler saıysynda 50 kg salmaqta Nurzat Ońǵarov úndistandyq Mandengbam Jadýnı Sınghten asa alǵan joq. 55 kg salmaqta Nursultan Altynbek úndistandyq Pavan Bartýaldan jeńildi. 70 kg salmaqta dodaǵa qosylǵan Nurbek Mursal qyrǵyz boksshysy Ihtııar Nıshonovtan basym tústi. Búgin ol jartylaı fınalda ýkraınalyq Iýrıı Zaharıevpen judyryqtasady. Aman Qonysbekov te (75 kg) álem kýboginiń júldegeri atana almady. Birinshi aıqasynda ózbek boksshysy Javohır Abdýrahımov Amannan basym tústi. Sanjaráli Begalıev (80 kg) ońtústikkoreıalyq Mınseng Kımdi yǵystyryp, jartylaı fınalǵa shyqty. Endi aǵylshyn boksshysy Toared Shıttýǵa qarsy aıqasqa túsedi. 90 kg salmaq dárejesinde Bekzat Tańatardyń da jolyn úndi boksshysy bógep, jeńis Navıın Kýmarǵa berildi. 85 kg salmaqta Sultanbek Aıbarulyna jerebe qarasty. Ol álem kýbogin birden jartylaı fınaldan bastaıdy da, búgin káris boksshysy Daehon Kımniń kúshin baǵamdaıdy. Asa aýyr salmaqta Danııal Saparbaı jartylaı fınalda úndistandyq Narendar Narendarmen aıqasady. Bıylǵy kóktemde Brazılııada ótken álem kýboginiń kezeńinde ekeýiniń joly túıisip, jerlesimiz aıqyn jeńgen edi.
• Islam yntymaqtastyǵy oıyndarynda elimizdiń gandboldan áıelder quramasy jartylaı fınalǵa shyqty. Shırek fınalda Ázerbaıjan quramasyn 34:31 esebimen eńserdi. Endi tegeýrindi qarsylas Túrkııa quramasyna qarsy alańǵa shyǵady.