Densaýlyq saqtaý mınıstri Aqmaral Álnazarova JRVI men tumaýdyń maýsymdyq ósýine baılanysty azamattarǵa adamdar kóp shoǵyrlanatyn oryndarǵa, ásirese jabyq keńistikterge barýdy shekteýdi usyndy, dep jazady Egemen.kz.
Mınıstrdiń aıtýynsha, halyq kóp júretin oryndarda tumaý, JRVI jáne COVID-19-dyń aldyn alý boıynsha jadynamalar, nusqaýlyqtar, plakattar men beınematerıaldar ornalastyrylǵan.
A.Álnazarova qarapaıym saqtyq sharalaryn saqtaý ınfeksııa juqtyrý qaýpin aıtarlyqtaı tómendetetinin atap ótti:
- adamdar kóp jınalatyn oryndarǵa barýdy shekteý;
- úı-jaıdy turaqty túrde jeldetý;
- qoldy óńdeý úshin antıseptık nemese dezınfeksııalyq sýlyqtardy qoldaný;
- JRVI nemese tumaý belgileri baıqalsa, balalardy mektepke nemese balabaqshaǵa jibermeý.
Vaksınasııa jáne medısınalyq kómek
«Tumaýǵa qarsy 2,1 mıllıon adam egildi. Vaksına qazirgi shtamdarǵa, onyń ishinde A H3N2-ge qarsy qorǵaıdy. Maýsymdyq órshýge oraı bastapqy medısınalyq-sanıtarlyq uıymdardyń jumysy kúsheıtildi. 995 mobıldi brıgada jáne 1 792 fıltr-kabınet jumys isteıdi, onyń 1 097-si – balalar men júkti áıelderge arnalǵan», dedi mınıstr Úkimet otyrysynda.
Shuǵyl medısınalyq kómek kórsetý úshin 1 618 jedel járdem brıgadasy jumys istep tur.
Aýrýhanalardaǵy jaǵdaı
Stasıonarlyq emdeýge arnalǵan 10 829 tósek-oryn daıyndalǵan, onyń ishinde eki myńǵa jýyq rezervtik oryn bar. Qazirgi tańda 8239 pasıent aýrýhanaǵa jatqyzylǵan, olardyń 6809-y – balalar. El boıynsha tósek-oryndardyń ortasha tolymdylyǵy 76% quraıdy.
Zattardyń jetkilikti qory bar ma?
Densaýlyq saqtaý mınıstrliginiń derekterine súıensek, vırýsqa qarsy jáne qyzý túsiretin preparattar, qorǵanys quraldary men dezınfeksııalyq zattardyń jetkilikti qory qamtamasyz etilgen. Mektepter men balabaqshalarda kúndelikti monıtorıng júrgizilip, tańǵy fıltr uıymdastyrylǵan, temperatýralyq jáne dezınfeksııalyq rejım saqtalyp otyr.
Buǵan deıin mınıstr Aqmaral Álnazarova Qazaqstandaǵy JRVI men tumaý boıynsha epıdemıologııalyq jaǵdaı, onyń ishinde gonkong tumaýynyń aınalymy týraly aıtqany málim.