Premer-mınıstr Oljas Bektenovtiń tóraǵalyǵymen ótken Úkimet otyrysynda Úkimettiń Ulttyq bankpen jáne Qarjy naryǵyn retteý jáne damytý agenttigimen 2026-2028 jyldarǵa arnalǵan makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasy bekitildi. Qujat Prezıdenttiń turaqty ekonomıkalyq ósýdi qamtamasyz etý, ınflıasııany tómendetý, ımportqa táýeldilikti azaıtý jáne azamattardyń tabysyn arttyrý jónindegi tapsyrmalaryn oryndaýǵa baǵyttalǵan, dep habarlaıdy Egemen.kz Úkimettiń baspasóz qyzmetine silteme jasap.
«Memleket basshysy Qazaqstan halqyna Joldaýynda Úkimetke Ulttyq Bankpen, Qarjy naryǵyn retteý jáne damytý agenttigimen birge Birlesken is-qımyl baǵdarlamasyn ázirleýdi tapsyrdy. Úkimettiń, Ulttyq banktiń jáne Qarjy naryǵyn retteý agenttiginiń birlesken is-qımyl baǵdarlamasy elimizdiń aldaǵy úsh jylǵa arnalǵan áleýmettik-ekonomıkalyq damýynyń negizgi mindetterin sheshýge baǵyttalǵan», dep atap ótti Oljas Bektenov.
Premer-mınıstrdiń orynbasary Serik Jumanǵarın birqatar negizgi baǵyt boıynsha elimizdiń áleýmettik-ekonomıkalyq damýy jónindegi sharalar keshenin qamtıtyn baǵdarlamanyń negizgi tásilderi týraly baıandady. Olardyń qatarynda halyqtyń tabysyn qoldaý, sapaly ósýdi qamtamasyz etý, shıkizattyq emes eksportty yntalandyrý, ekonomıkany sıfrlandyrý jáne JI damytý, ınvestısııalyq jáne tarıftik saıasatty jetildirý, ınflıasııa men ekonomıkadaǵy memlekettiń úlesin azaıtý sharalary bar. Sonymen qatar baǵdarlama aqsha-nesıe saıasaty,qarjy sektoryn damytý jáne baǵany retteý boıynsha bloktardy qamtıdy.
Ulttyq bank tóraǵasy Tımýr Súleımenov baǵa turaqtylyǵyn qamtamasyz etý jáne qarjy sektoryn damytý boıynsha monetarlyq, mıkro jáne makroprýdensıaldy sharalar paketin usyndy. Qarjy naryǵyn retteý jáne damytý agenttiginiń tóraǵasy Mádına Ábilqasymova bızneske nesıe berýdi keńeıtý, tutynýshylyq nesıeleý segmentindegi táýekelderdi tómendetý, kásipkerlerdi qoldaý úshin retteý tásilderin jetildirý jónindegi qadamdar týraly baıandady.
Premer-mınıstr baǵdarlamany ekonomıkanyń sapaly ári ornyqty ósýi men ınflıasııany tómendetý esebinen júzege asyrý azamattardyń turmys deńgeıi men ál-aýqatyn arttyrýdyń negizgi quraly bolatynyn atap ótti.
Negizgi maqsattar – ekonomıkanyń jyl saıynǵy ósimin keminde 5%-ǵa jáne halyqtyń naqty tabysyn orta eseppen 2-3%-ǵa arttyrý. Jańa ınvestısııalyq sıkldi iske qosý, bıznes júrgizý úshin kedergilerdi joıý jáne memlekettiń ekonomıkadaǵy úlesin barynsha azaıtý, sondaı-aq jumyspen qamtýǵa járdemdesý jáne áleýmettik qoldaýdy naqty ıesine jetkizýge múmkindik beretin jańa sharalardy júzege asyrý kózdelip otyr. Inflıasııany tómendetýge, teńgerimdi tarıftik saıasatty júrgizýge, eksportty ulǵaıtýǵa jáne ımportqa táýeldilikti azaıtýǵa basa nazar aýdarylady.
Premer-mınıstr Oljas Bektenov ekonomıkany ornyqty damytý úshin barlyq jaýapty memlekettik organdar úılesimdi jumys istegende ǵana múmkin bolatynyn eskere otyryp, jaýapty vedomstvolarǵa birqatar tapsyrma berdi.
Ulttyq ekonomıka, Aýyl sharýashylyǵy jáne Saýda mınıstrlikteri ınflıasııa deńgeıin baqylaý men tómendetý, sondaı-aq baǵanyń ósýine syrtqy faktorlardyń áserin barynsha azaıtý jumystaryn kúsheıtý tapsyryldy.
Janar-jaǵarmaı materıaldarynyń baǵasyn kóterýge engizilgen moratorııdi eskeretin bolsaq, kórshiles eldermen aradaǵy baǵa dısparıteti kúsheıip keledi. Qarapaıym tilmen aıtqanda, bizdiń benzın men dızel kórshilerge qaraǵanda áldeqaıda arzan. Sondyqtan Energetıka, Saýda, Qarjy, Ishki ister mınıstrlikteri men Qarjylyq monıtorıng agenttigi jáne Ulttyq qaýipsizdik komıtetiniń Shekara qyzmeti otyn balansyna jáne munaı ónimderiniń basqa elderge zańsyz ótip ketýine jol bermeý máselesine qatań baqylaýdy qamtamasyz etýi qajet.
Aýyl sharýashylyǵy, Saýda jáne О́nerkásip mınıstrlikterine ishki naryqtyń otandyq ónimmen qamtamasyz etilýin arttyrýy tıis. Turaqtandyrý qorlaryn, forvardtyq sharttardy, ónim baǵasyn arzandatýǵa beriletin sýbsıdııalardy jáne saýda jelilerimen kelisimderdi belsendi paıdalaný arqyly azyq-túlik baǵasyn turaqtandyrý, ásirese búginde ımportqa táýeldiligi joǵary ónimder óndirisin ulǵaıtýǵa basymdyq berilýi kerek. Saýda mınıstrligi óńir ákimderimen birlesip, deldaldyq shemalardy anyqtaý jumysyn kúsheıtýi qajet.
Investısııalyq jobalardy iske asyrýǵa jáne AО́K-de tereń óńdelgen ónimderdi óndirýge erekshe nazar aýdarylýy tıis.
Saýda, Aýyl sharýashylyǵy, О́nerkásip mınıstrlikterine múddeli memlekettik organdarmen birlesip, shıkizattyq emes ónimderdi eksporttaýshylardy yntalandyrýdyń keshendi sharalaryn ázirleý tapsyryldy.
Sonymen qatar naqty sektoryn nesıelendirýge tartý arqyly basym ınvestısııalyq jobalardy júzege asyrýdy jedeldetý, damý ınstıtýttarynyń, onyń ishinde «Báıterek» holdıngi men Kazakh Invest rólin arttyrý, iske asyrylyp jatqan sharalardy aqparattyq qamtamasyz etý boıynsha tapsyrma berildi.
Ulttyq ekonomıka mınıstrligi Ekonomıkalyq saıasat jónindegi keńestiń otyrystarynda qarap, jurtshylyqty habardar etip otyrýy kerek. Baǵdarlamadaǵy is-sharalardyń oryndalý barysyna monıtorıng júrgizý tapsyryldy.
Premer-mınıstr barlyq birinshi basshyǵa baǵdarlamany sapaly ári ýaqtyly júzege asyrýdy qamtamasyz etý qajettigin atap ótti.
Premer-mınıstrdiń orynbasarlaryna óz baǵyttary boıynsha Baǵdarlamadaǵy is-sharalardyń oryndalýyna baqylaýdy qamtamasyz etý tapsyryldy.