ASTANA. 22 naýryz. Qazaqstan quramasy fýtzaldan 2016 jylǵy Eýropa chempıonatyna beriler joldama úshin dodany jalǵastyrady. Rýmynııada ótken irikteý týrnırinde fýtbolshylarymyz óz tobynda ekinshi oryn aldy. Sońǵy oıyndy Grýzııaǵa qarsy ótkizgen ulttyq qurama 4:0 esebimen jeńiske jetti. Bul týraly egemen.kz habarlady.
Grýzııamen bolǵan oıynda qazaqstandyq fýtbolshylar aıqyn basymdyq tanytty. Matchqa tolyq baqylaý jasaǵan Rıkardo Kakaýdyń shákirtteri kezdesýdiń 11-mınýtynda esep ashty. Goldyń avtory – Mıhaıl Pershın. Úziliske deıin taǵy bir oıynshymyz Nıkolaı Pengrın mergendigimen kózge túsip, esepti eseledi.
Ekinshi kezeńde de Grýzııa eshqandaı qarsylyq kórsete almady. Nátıjesinde, 31-mınýtta Konstantın Chebotarev esepti 3:0-ge jetkizdi. Al oıynnyń núktesin qazaq fýtbolshysy qoıdy. Quramadaǵy beldi oıynshylardyń biri Shyńǵys Esenamanov kezdesýdiń 39-mınýtynda qarsylastaryn birjola «nokaýtqa» jiberip, komandasynyń tórtinshi golyn soqty.
Osylaısha irikteý týrnıriniń 7-tobynda oınaǵan Qazaqstan úsh oıynnyń ekeýinde jeńiske jetip, 6 upaıǵa ıe boldy. Bizdiń topta oınaǵan Portýgalııa men Rýmynııa da dál osyndaı nátıje kórsetti. Alaıda, dop aıyrmasy arqyly Pıreneı túbeginiń ókilderi top jaryp, tikeleı joldamaǵa ıe boldy. Al Qazaqstan qarymta oıyn ótkizýge múmkindik beretin ekinshi orynǵa taban tiredi. Sondaı-aq, Rýmynııa da jıǵan upaıyna baılanysty joldama úshin talasty jalǵastyrady.
Qarymta kezdesýler 15 jáne 22 qyrkúıek kúnderi ótedi. Bul synda bizdiń qarsylasymyz Bosnııa jáne Gersegovına, Vengrııa, Belarýs, Ázerbaıjan, Chehııa, Slovakııa jáne Rýmynııa quramalarynyń biri bolýy múmkin.
Al óz tobynda birinshi oryn alǵan Ispanııa, Italııa, Horvatııa, Ýkraına, Portýgalııa, Reseı jáne Slovenııa quramalary tikeleı joldamaǵa ıe boldy. Serbııa jarys qojaıyny retinde joldamany irikteýsiz ıemdendi. Fýtzaldan Eýropa chempıonaty 2016 jyly 2-13 aqpan aralyǵynda ótedi.
Aıta keteıik, osy týrnır barysynda bizdiń jigitter alǵashqy oıyndy Rýmynııaǵa qarsy ótkizip 4:6 esebimen ese jiberdi. Esesine, ekinshi kezdesýde azýly Portýgalııany qapy qaldyrdyq. Sol matchta fýtbolshylarymyz 3:1 esebimen jeńgen edi. Al sońǵy oıyndaǵy nátıjeni joǵaryda aıttyq.
Elaman Qońyr.
Derek: egemen.kz.
Sýret: afrk.kz.