Estonııa Prezıdenti Alar Karıs «Arǵymaq» kesheninde qazaq dástúrimen tanysty. Estonııa Prezıdenti Alar Karıs bastaǵan 150-ge jýyq delegasııa resmı sapar aıasynda mádenı baǵdarlamaǵa qatysty, dep jazady Egemen.kz.
Qonaqtarǵa ulttyq dástúrdi pash etý maqsatynda birneshe kıiz úı tigildi. Kıiz úıler qazaq oıý-órnekterimen, turmystyq buıymdarymen bezendirilip, qonaqtarǵa qazaq mádenıeti men salt-dástúri tanystyryldy.
Delegasııa ókilderi ulttyq mýzykalyq aspaptardy tyńdap, dástúrli qolóner jármeńkesin tamashalady. Zergerlik buıymdar, toqymashylyq ónimderi, aǵash jáne bylǵarydan jasalǵan buıymdar, kesteleý óneriniń týyndylary, kelgen qonaqtar birqatar kádesyılardy estelikke satyp aldy.
Prezıdent Alar Karıs pen jubaıy «Asyq atý» ulttyq oıynyn oınap, onyń balalardyń qozǵalys daǵdylaryn damytýǵa tıgizer paıdasyna qanyqty. Atshabar alańynda «Qyz qýý», «Teńge ilý», «Kókpar», «Aýdaryspaq» sııaqty ulttyq at sporty oıyndary kórsetilip, qonaqtar qazaqtyń erlik dástúri men jylqy baptaý mádenıetine qanyqty.
Eston delegasııasy qazaq halqynyń qonaqjaılylyǵy men mádenı murasyna tánti bolyp, is-shara eki el arasyndaǵy mádenı baılanystardy nyǵaıtýǵa septigin tıgizetinin aıtty.