Ata-baba arýaǵyna taǵzym etip, quran baǵyshtaıtyn elmiz. Shelpek pisirip, ıis shyǵarý qazaq dúnıetanymynyń ejelden jalǵasqan dástúri. Alaıda dál osy túsinik qıyrdaǵy meksıkalyqtarda da bar bolyp shyqty.
Olar da qaıtys bolǵan týystaryna joqtaý óleń aıtyp, arnaıylap kúlshe nan pisiredi. Tek oǵan bal jaǵyp, tátti qylady. Afrıkanyń taǵy taıpalarynda da osy dástúr kezdesedi. Ǵalymdar muny kúlli adamzatqa ortaq mıftik sanamen baılanystyrady. Iаǵnı Adam ata men Haýa ana bıdaı jep, pánıge qýylǵannan keıin, dál osy daqyl – adam arhetıpinde eki dúnıeniń dánekeri retinde saqtalǵan. «Ańyz túbi – aqıqat», bul pikirdi de esepke almaýǵa bolmas.