Qyzylorda oblysy boıynsha Ekonomıkalyq tergep-tekserý departamenti memleket qarjysyn asa iri mólsherde jymqyrý deregin anyqtap, oǵan qatysy bar tulǵalardyń zańsyz áreketteriniń jolyn kesti, dep jazady Egemen.kz.
Tergeý nátıjesinde belgili bolǵandaı, Qarmaqshy aýdanyna qarasty Aqaı aýylyndaǵy mekteptiń bas esepshisi Aınur Eralıeva ózine senip tapsyrylǵan mektep dırektorynyń elektrondyq sıfrlyq qoltańbasyn paıdalana otyryp, qyzmettik ókilettigin teris paıdalaný arqyly mektep muǵalimderi M.Aıjigit, A.Jaryqbaeva, J.О́tepbergenova, A.Nurmuhanova, G.Baımaǵambetova, G.Jomartpen aldyn ala sóz baılasyp, bótenniń múlkin asa iri mólsherde jymqyrǵan.
Bas esepshiniń sybaılasy Aıbol Taýpıqov qylmysty iske asyrý kezinde kómek kórsetip, jymqyrylǵan qarjyny bólisý men jasyrýǵa járdemdesken. Al atalǵan muǵalimder jymqyrylǵan qarajatty ózara bólisken. Tergeý derekteri boıynsha, qylmystyq top 2022-2024 jyldar aralyǵynda memleketke jalpy somasy 42 500 474 teńge mólsherinde materıaldyq zalal keltirgen.
Sot úkimimen Aınur Eralıeva Qylmystyq kodekstiń 189-babynyń 4-bóliginiń 2) tarmaǵy boıynsha kináli dep tanylyp, 7 jyl merzimge bas bostandyǵynan aıyrý jazasyna kesildi. Alaıda sot QK-niń 74-babynyń 1-bóligine sáıkes, sottalýshynyń kámeletke tolmaǵan balasy 14 jasqa tolmaýyna baılanysty jazanyń oryndalýyn 5 jyl merzimge keıinge qaldyrdy. Sonymen qatar ol qarjy jáne býhgalterlik esep salasynda jumys isteý quqyǵynan 10 jyl merzimge aıyryldy. Jazasyn qylmystyq atqarý júıesiniń ortasha qaýipsizdik mekemesinde óteıdi. Aıbol Taýpıqovqa QK-niń 63-baby qoldanylyp, 7 jyl merzimge shartty jaza taǵaıyndaldy. Qalǵan alty muǵalimniń árqaısysyna 2 jyldan 2 jyl 4 aıǵa deıin bas bostandyǵyn shekteý jazasy belgilendi.
Atalǵan is boıynsha memleketke keltirilgen zalal sottalýshylardan óndiriledi.