Túrki mýzyka aspaptarynyń qudireti

Túrki halyqtarynyń mýzykalyq aspaptaryn jasaý dástúrin keshendi zertteý, ejelgi tehnologııalar men qazirgi ınno­va­sııa­lyq tásilderdiń ózara baılanysyn aıqyndaý, sondaı-aq sheberler, ǵalymdar, oryndaýshylar men zertteýshiler arasynda tájirıbe almasýǵa arnalǵan ǵylymı-praktıkalyq alań qurý qajet. Túrki máde­nıeti jáne murasy qory­nyń prezıdenti Aqtoty Raıym­qulova dástúr men qazirgi zamannyń birligi jańa zertteý­lerge, tehnologııalyq tásil­derge jáne halyqaralyq ǵylymı yntymaqtastyqqa keń múmkindikter ashatynyn atap ótip, sımpozıým osy saladaǵy mamandardy biriktiretin mańyzdy platforma ekenin nazarǵa aldy. Plenarlyq otyrysta Parlament Sena­tynyń depýtaty, akademık Darhan Qydyráli, Mádenıet jáne aqparat mınıstrligi Mádenıet komıtetiniń tóraǵasy Erlan Dákenov, Qazaqstan Respýblıkasynyń IýNESKO jáne ISESKO isteri jónindegi Ulttyq komıssııasynyń bas hatshysy Janar Shaımenova, «Majar murasy úıi» bas ke­ńesshisi, Majarstannyń eńbek sińirgen ártisi Akoch Gergeı sóz sóıledi. Sımpozıým aıasynda «Ortaq ún: túrki mýzykalyq aspaptaryn zertteý jáne halyqaralyq yntymaqtastyq» taqyrybynda dóńgelek ústel uıymdastyryldy. Tal­qy­laý barysynda túrki halyq­­tarynyń mýzykalyq mura­syn zertteý jáne osy sala­daǵy ınstıtýsıonaldyq ynty­maq­tastyqty keńeıtý máseleleri kóterildi.

Is-sharada Túrki mádenıeti jáne murasy qory men Ýzeır Gadjıbeılı atyndaǵy Baký mýzyka akademııasy birle­sip basyp shyǵarǵan «Túr­kitil­­des mem­leketterdiń ult­tyq mýzykalyq aspaptary» kitabynyń tanystyrylymy ótti. Eńbek tórt tilde daıyndalǵan. Basylym ha­lyq­aralyq deńgeıde túrki mýzykalyq murasyn tanystyrý men ǵylymı júıeleýdiń mańyzdy kózi ispetti.

Qatysýshylar túrki halyq­tarynyń mýzykalyq aspaptaryn jasaý murasyn saqtaý, zertteý jáne bolashaq urpaqqa jetki­zýge arnalǵan qarar qabyldady. Qu­jatta mýzykalyq aspaptar boıynsha biryńǵaı ǵylymı baza qurý, dástúrli sheberlik mektepterin júıeli zertteý, mýzykalyq aspap jasaýdy oqytatyn arnaıy kýrstardy bilim baǵdarlamalaryna engizý, sondaı-aq sıfrlyq arhıvteý, 3D-modeldeý jáne halyqara­lyq ǵylymı yntymaqtas­tyqty keńeıtý sııaqty basym baǵyttar kórsetilgen. Qararda IýNESKO jáne ISESKO aıasynda túrki mýzykalyq mura­syn halyqaralyq deńgeıde keńinen tanystyrýǵa baǵyt­talǵan birlesken bastamalardy damytý kózdelgen jáne Túrki halyqtarynyń mýzy­kalyq aspap sheberleri assosıasııasyn qurý múmkindigin qarastyrýǵa kelisim bil­dirilgen.