Japonııanyń astanasy Tokıoda 15 qarashada jalaýy jelbiregen XXV jazǵy Sýrdlımpıada dodasy máresine jetti. Elimizdiń sportshylary rekordtyq nátıje tirkep, buryn-sońdy buıyrmaǵan júldege keneldi.
Sańlaqtardyń Tokıo tórinen búginge deıingi oljalaǵan júldesi jaıynda keńinen qamtyp jazdyq. Tórt jylda bir ret uıymdastyrylatyn dúbirli alamannyń aqyrǵy kúnderinde de sportshylarymyz el mereıin ústem etti. Grek-rım kúresinen beldesýge túsken Andreı Samarın 67 kg salmaq dárejesinde irikteý kezeńin sátti ótkizdi. Birinshi beldesýinde qyrǵyz Dinmuhamed Bıgeldıevti 5:2 esebimen eńserip, shırek fınaldyq tartysta bolgar balýany Dılıan Dımıtrovty 8:0 esebimen upaı ustatpady. Jartylaı fınaldaǵy qarsylasy armıan Jora Gregorıandy da dál sondaı basymdyqpen yǵystyrdy. Fınaldyq tartysta ırandyq Mehdı Bakshyny 11:1 esebimen týlaqtaı ılep jeńiske jetti.
– Men alǵash ret Sýrdlımpıada oıyndaryna qatysqanyma qaramastan elimizdiń úmitin aqtap, altyn medal ıelendim. Bul ózimniń ǵana emes, bapkerlerimniń de jeńisi. Biz buǵan toqmeıilsip toqtap qalmaımyz, alda áli de dúbirli dodalar ótedi. Meniń maqsatym aıqyn, úsh dúrkin Sýrdlımpıada chempıony ataný, – deıdi 21 jastaǵy talantty balýan. Almaty oblysy, Jambyl aýdany, Qarǵaly aýylynyń týmasy 2023 jyly jastar arasyndaǵy álem chempıonatynda top jaryp, óziniń myqtylyǵyn dáleldegen edi. Byltyr Malaızııada ótken H Azııa–Tynyq muhıt oıyndarynyń chempıony atandy. Samarınniń altyn medali jalpy eseptegi nátıjemizdi de jaqsarta tústi.
Erkin kúresten beldesýge túsken balýandarymyz da el úmitin aqtaı bildi. Olar 1 altyn, 1 kúmis, 3 qola medal enshiledi. Shadııar Pernesh (65 kg) Sýrdlımpıada chempıony atansa, Ǵabıt Esjanov (57 kg) – kúmis, al Ǵasyr Turǵanbaı (74 kg), Sabyrjan Rsaly (86 kg), Haırathaan Shonký (125 kg) qola júldeni qanaǵat tutty. Sýrdlımpıadanyń eki dúrkin chempıony H.Shonkýǵa jankúıerler de, bapkerler de zor senim artqan edi. Alaıda jartylaı fınalda súrinip, altyn medaldan basty úmitker balýan qola júldege ázer qol jetkizdi.
Ústel tennısinen erler quramasyna da Sýrdlımpıadanyń qola medali buıyrdy. Qanat Qońqybaev, Danııar Eskendirov, Bıjan Tólebaev, Búrkitbaı Abylaı bastaǵan jigitter aldymen Kolýmbııa quramasyn 3:0 esebimen utyp, Polshanyń ústel tennısshilerin 3:1 esebimen jeńdi. Shırek fınaldyq saıysta úndistandyq qarsylastaryn da aıqyn utyp (3:0) jartylaı fınalda Qytaı quramasyna ese jiberdi de, qola medaldy enshiledi.
Taekvondo dodasynda Aıda Maqatovaǵa (67 kg) qola medal buıyrdy. Vıktor Frýndın (+80 kg) 5-oryndy mise tutsa, Móldir Muqasheva (+67 kg) men Rýslan Ahmetov (80 kg) irikteý kezeńinen asa almady.
Jeńil atletıka tartysynda uzyndyqqa sekirýden fınalda baǵyn synaǵan Faına Meıirmanova 5 m 17 sm nátıjesimen 8-orynǵa turaqtady. 5000 metrlik fınaldyq júgirýde synǵa túsken Qýanysh Temirbaev ta júldesiz qaldy. 4h400 metr qashyqtyqqa estafetalyq saıystyń fınalynda áıelder quramasy 4:45.92 ýaqytpen 7-orynǵa turaqtady. Al osy qashyqtyqta erler quramasy 3:27.95 nátıjesimen 6-oryn aldy.
Júzýden birneshe qashyqtyqta synǵa túsken sportshylarymyz júldeniń jalynan ustaý bylaı tursyn, irikteý kezeńinen asa alǵan joq. Badmıntonnan da ulttyq qurama Úndistan komandasyna 0:5 esebimen ese jiberip, toptyq kezeńnen qaıtty.
Sportshylarymyzdyń jalpy esepte 8 altyn 4 kúmis, 13 qola medal oljalaýy – rekordtyq kórsetkish. Buǵan deıin bizdiń qyz-jigitter dál mundaı mejeden kórine alǵan emes. Japonııa eli ótkizgen Sýrdlımpıada saıysyna 81 elden kelgen estý qabiletine zaqym kelgen 3 myńǵa jýyq sportshy 21 sport túrinen tartysqa tústi. Elimizden attanǵan 78 sańlaq 8 sport túrinen orasan nátıje kórsetti. Elimizdiń sýrdlımpıadashylary buǵan deıin qatysqan tórt jyldyq dodasynda úzdik ondyqqa ilingen emes. Bul joly bizge 8-oryn buıyrdy. Kósh basynda – 32 altyn, 38 kúmis, 29 qola medal oljalaǵan Ýkraına sportshylary tur. Ekinshi satyda beıtarap komanda retinde qosylǵan sportshylar tur. Olar 31 altyn, 12 kúmis, 7 qola alsa, úzdik úshtikti túıindegen AQSh sýrdo sportshylary 17 altyn, 8 kúmis, 13 qola medal ıelendi.