Almatyda qaıyrymdylyq qorynyń basshysy 15 jastaǵy jasóspirimdi bazar aýmaǵynda ótkizilgen qaıyrymdylyq aksııasyna qarajat jınaýǵa qatystyrǵany belgili boldy, dep habarlaıdy Egemen.kz.
Nátıjesinde, jasóspirim ákimshilik zańnamany buzýmen baılanysty jaǵdaıǵa tap bolyp, qor jetekshisine qatysty QR ÁQBtK-niń 128-babynyń 1-bóligi boıynsha ákimshilik is qozǵaldy.
«Sot otyrysynda qor dırektory óz kinásin moıyndap, is materıaldarynda kórsetilgen mán-jaılardy rastady. Ákimshilik quqyq buzýshylyq jınaqtalǵan dáleldemelermen, sondaı-aq kámeletke tolmaǵan jasóspirimniń jáne dırektordyń sózderimen rastaldy», delingen Joǵarǵy Sottyń habarlamasynda.
Aıta keteıik, ÁQBtK-niń 128-babynyń 1-bóligine sáıkes, mundaı quqyq buzýshylyq úshin jeke tulǵalarǵa 50 AEK mólsherinde aıyppul qarastyrylǵan.
«Almaty qalasynyń kámeletke tolmaǵandardyń isteri jónindegi mamandandyrylǵan aýdanaralyq soty jasalǵan quqyq buzýshylyqtyń sıpatyn, kináliniń jeke basyn jáne jaýaptylyqty aýyrlatatyn mán-jaılardyń joqtyǵyn eskere otyryp, 196 myń teńgeden astam aıyppul saldy», delingen habarlamada.