ATYRAÝ. 20 aqpan. Atyraý oblysynda Qulsary qalasynan Aqtóbe oblysyna barý úshin jolǵa shyǵyp, qar qursaýyna qalǵan 4 jolaýshy qutqaryldy. Bul týraly egemen.kz tilshisi habarlady.
Qulsary qalasynyń 4 turǵyny 18 qańtarda túske jaqyn «Lada Granta» jeńil kóligimen Aqtóbe oblysyna barý úshin jolǵa jınalǵan. Olar Baıǵanın aýdanyndaǵy Oımaýyt aýylynda ótetin sadaqaǵa qatyspaq bolǵan. Jolaýshylar sol kúni keshkilik 17.00. saǵatta aǵaıyndarymen telefon baılanysyna shyqqanda Qulsary qalasynan 200 shaqyrym qashyqtaǵy «Qarajar qystaǵynyń mańyndamyz» depti. Sodan keıin olarmen birde-bir uıaly telefonmen baılanysý múmkin bolmaǵan. Telefon baılanysy úzilgenine alańdaǵan aǵaıyndarynyń habarlaýymen 19 qańtarda jolaýshylardy izdeý bastaldy.
Izdeý jumystaryna tótenshe jaǵdaılar departamentinen «Trekol» jol talǵamaıtyn kóligi, qutqarýshylar men dáriger jumyldyryldy. Kómekke «Dossormunaıgaz» basqarmasynyń «Djıp» kóligi men munaıshylar da qol ushyn sozdy. Jolaýshylardy izdeýshiler keshe keshkilik olardy Qyzylqoǵa aýdany aýmaǵyndaǵy «Aqsýat» qystaýynan 18 shaqyrym jerden tapty. Belgili bolǵanyndaı, jolaýshylar kóligi qarǵa batyp qalypty. Bul mańda uıaly baılanys jelisi ustamaıdy eken. Kóliktegi tórt jolaýshy –eki er jáne eki áıel adam qutqaryldy.
Joldasbek Shópeǵul.
Derek: egemen.kz.
Sýret: Rahym Qoılybaev.