Medısınalyq qyzmet sapasy arta tústi

Úkimettiń «Ortalyq atqa­rýshy organdar basshylarynyń halyqpen kezdesýlerin ótkizý týraly» qaýlysy aıasynda Al­maty oblysyna jumys sapa­ry­men kelgen Densaýlyq saq­taý mınıstri Aqmaral Álna­zarova Eńbekshiqazaq kóp­beıin­di ortalyq aýdandyq aýrý­hana­synyń jumysymen tanysyp, Talǵar aýdandyq ákimdiginde azamattyq sektor ókilderimen, óńir turǵyndarymen kezdesý ót­kizdi. Alqaly basqosýǵa Al­maty oblysy ákiminiń birinshi orynbasary Qanat Esbolatov, oblystyq densaýlyq saqtaý bas­qarmasynyń basshysy Er­jan Súleımenov, medısına salasynyń jaýapty mamandary qatysty. Kezdesý barysynda mınıstr bıylǵy 9 aıdyń qory­tyndysyna toqtalyp, densaý­lyq salasyndaǵy oń ózgeristerdi atap ótti.

Densaýlyq salasyndaǵy eń oń­taıly sheshim, budan bylaı buqara skrınıngtik tekserýden kepildi medısınalyq kómek aıasynda óte alady. Eli­miz­diń bas dárigeri Aqma­ral Álnazarova aqjoltaı habardy halyqqa jetkizip qana qoımaı, el azamattarynyń ómir súrý ja­sy ulǵaıǵanyna baılanys­ty, skrı­nıngtik tekserýden ótý 76 jas­qa uzartylǵanyn atap aıtty.

– Tegin medısınalyq kómek­tiń kepildik berilgen paketine endigi kezde onkoskrınıng te qo­syldy. Bul óz kezeginde 300 myń saqtandyrylmaǵan halyqtyń tekserýden ótýine múmkindik beredi, – dedi A.Álnazarova.

О́ńir turǵyndarymen kez­desý barysynda vedomstvo basshysy jedel járdem qyz­metindegi ózgeristerdi málim etti. Mınıstrdiń aıtýynsha, 4-sanattaǵy jedel shaqyrtýlar MSAK deńgeıine berilip, mobıl­dik brıgadalar men call-or­talyqtar engizildi. Bul jedel járdem júktemesin 40-50%-ǵa tó­mendetken. Son­daı-aq jedel járdem kabınet­teri ashylýynyń arqasynda stasıo­narlarǵa túsetin óti­nishter sany 20%-ǵa azaıǵan.

Mınıstr medısınalyq saq­tandyrý júıesin kúsheıtý jó­ninde qabyldanǵan zańnamalyq ózgeristerdi de túsindirdi. Al­daǵy jyldan bastap MÁMS jarnalarynyń esepteý bazasy ulǵaıady, júıege qosymsha 200 mlrd teńge túsedi. 2027 jyldan bastap memleket jarnalary 2%-dan 4,7%-ǵa deıin kezeń-kezeńimen ósedi. Aıta keteıik, Almaty oblysynda búginde halyqtyń 83,2%-y saqtandyrylǵan, 16,8%-y saq­tandyrylmaǵan. Bul baǵyt­taǵy jumysty úılestirý maqsatynda óńirlik shtab qurylǵan. Mı­nıstr densaý­lyq saqtaý ın­fra­­qurylymyn jańǵyrtý, medısınalyq kómek­tiń sapasyn arttyrý, qol­jetimdiligin ke­ńeıtý jumys­y jalǵasa­tynyn aıtty.

Búginde Almaty oblysynda tur­ǵyndarǵa 356 medısınalyq uıym qyzmet kórsetedi, onyń 54-i – jeke menshik nysandar. Aımaqtaǵy den­saýlyq saqtaý salasynda 3 myńǵa jýyq dáriger, 10 myńnan asa orta býyn medısına qyzmetkeri eńbek etedi.

О́tken jyly oblystyń medısı­nalyq mekemeleri jal­py quny 3,7 mlrd teńge­ni qu­raıtyn 239 birlik medı­sına­lyq qural-jabdyqpen, 15 sanıtarlyq avtokólikpen qamta­masyz etildi. Jahandyq qordyń qoldaýymen ftızıopýlmonologııa ortalyǵy 51,5 mln teńgege rentgen apparatyn aldy.

Osy jyly 1 magnıtti-rezo­nansty tomograf, 1 angıograf, 10 beıne­endoskopııalyq tirek, 2 mammograf, 2 joǵary sapaly ýltradybystyq zertteý apparaty, jalpy sany 347 medısınalyq tehnıka satyp alýǵa jergilikti bıýdjetten 6,07 mlrd teńge bólindi. Sonyń nátıjesinde oblystyń medısınalyq uıymdaryn jab­dyqtarmen qamtamasyz etý deń­geıi 79%-dan 92%-ǵa jetti.

«Qazaqstan halqyna» qory­nyń qoldaýymen berilgen 2 jyl­­jymaly medısınalyq keshen arqyly 2024 jyly 15 871 aýyl turǵyny onkologııalyq skrınıngten ótken. Aýyldyq jerlerde ınfraqurylymdy jańǵyrtý jumysy jalǵa­syp jatyr. Atap aıtar bol­saq, «Aýyldyq densaýlyq saqtaý­dy jańǵyrtý» ulttyq joba­sy aıasynda jalpy quny 3,5 mlrd teńgeni quraıtyn 38 medı­sınalyq nysannyń qurylysy josparlanǵan. Búginde 23 nysan paıdalanýǵa berildi, qalǵan 15 nysan osy jyldyń sońyna deıin iske qosylady. Sonymen qatar bıyl jergi­likti bıýdjet esebinen 7 jańa medısınalyq mekemeniń qurylysy bastaldy. 2022 jyly Eńbekshiqa­zaq kópbeıindi aýdanaralyq aýrý­hanasynda Dúnıejúzilik densaýlyq saqtaý uıymy­nyń alǵashqy medısınalyq-sanı­tarlyq kó­mek kórsetý jónindegi demon­strasııalyq alańy ashyldy.

Stasıonar pasıentterine kórse­tiletin kómektiń sapasyn arttyrý maqsatynda óńirdiń medısınalyq mekemelerin­de gospıtaldyq farmasııa bólim­sheleri jumysyn bas­tady. Búginde oblysta travmatologııa, neırohırýrgııa, rentgenohırýrgııa, LOR, ýrologııa baǵyttarynda joǵary tehnologııalyq medısınalyq kómek kórsetiledi. Sonymen qatar respýblıkalyq deńgeıde jasalatyn endoprotezdeý, neırohırýrgııalyq operasııalar júrgizilip jatyr.

Balalarǵa arnalǵan ońaltý qyz­metteri de keńeıip keledi. «Qam­qorlyq» qorynyń qol­daýymen oblysta serebraldy sal aýrýy, aýtızm, epılepsııa, psıhıkalyq jáne sóıleý damýynyń buzylystary, son­daı-aq ókpe, júrek-qan tamyr­­lary aýrýlary bar bala­larǵa arnalǵan ońaltý orta­lyq­tary ashyldy. Ortalyqtar Eńbek­shiqazaq aýdanaralyq aýrýhanasy, Jambyl, Kegen aýdandyq aýrýhanalarynyń bazasynda jumys isteıdi. Bul ortalyqtar erekshe qajet­tiligi bar balalardyń medı­­­sı­nalyq kómekke qolje­timdi­ligin arttyryp, ońaltý nátıje­lerin jaqsartýǵa múm­kindik berdi.

О́ńirdegi kadr tapshylyǵyn tómen­detý maqsatynda jyl sa­ıyn jergilikti bıýdjet esebinen medısınalyq kadr­lardy daıar­laý júzege asyrylyp keledi. Byltyrǵy jyly oblysqa 90 jańa dáriger kelgen. Qazirgi tańda medısına­lyq rezıdentýrada 180 maman jergilikti bıýdjet qarajaty esebinen oqyp jatyr. Asa tapshy mamandyqtar boıynsha qyzmetke kelgenderge 8 500 000 teńge kóleminde bir rettik áleýmettik tólem beriledi.

– Halyqtyń suranysyna saı keletin tıimdi densaýlyq saqtaý júıesin qa­lyptastyrý – basty mindetimiz, – dep qory­tyn­dylady Aqmaral Shárip­baıqyzy.

Sapar sońynda sala basshysy Qonaev qalasyndaǵy kópbeıindi qalalyq aýrýha­nasynyń jumysymen tanysty. Azamattardy jeke ótinish­terimen qabyldady. Sondaı-aq brıfıngte BAQ ókilderiniń saýal­daryna jaýap berdi.