Búgin Astanadaǵy «Alataý» sport saraıynda aýyr atletıkadan Qazaqstan birinshiligi bastaldy. 7 jeltoqsanǵa deıin jalǵasatyn básekede elimizdiń 17 óńirinen kelgen 177 sportshy baq synaıdy, Egemen.kz.
Olardyń qatarynda álem chempıondary Nurǵısa Ádiletuly men Artıom Antropov ta bar.
Aýyr atletter el birinshiliginde jekeleı jattyǵýlarda 54 júlde jıyntyǵyn sarapqa salady.
Saıystyń birinshi kúninde erler arasynda 65 keli jáne áıelder arasynda 58 keli salmaq dárejesinde jeńimpazdar anyqtalady.
«Chempıonatqa qatysýshy sportshylardyń quramy óte myqty. Aldaǵy kúnderi aýyr atletterimizdiń elorda tórinde rekord jańartatynyna senemin. Jeńimpazdar 2026 jyly Japonııada ótetin jazǵy Azııa oıyndarda el namysyn qorǵaıdy», dedi Astana qalasy Dene shynyqtyrý jáne sport basqarmasy basshysynyń orynbasary Azamat Aǵzamov.
Aıta keteıik, buǵan deıin eresekter arasyndaǵy el chempıonaty Astanada 2022 jyly uıymdastyrylǵan edi.