Qalanyń qarbalasynan qoly qalt etkender dástúrli Salbýryn festıvaliniń 5 jyldyq mereıtoıyna oraı ótkizilip jatqan kórmeni tamashalaýǵa jınaldy. A.Pýshkın kitaphanasyndaǵy bul kórmege óńirdegi fotograftardyń otyz shaqty jumysy qoıyldy. Olar bes jyl boıy qyran qalyqtaǵan festıvalge baryp, sátti kadr izdeýmen, is-sharany nasıhattaýmen aınalysyp kelgen.
Ulan aýdany ákimdiginiń qoldaýymen, kitaphana ujymynyń uıymdastyrýymen ótken kórmege Bozanbaı aýylynan búrkitshiler otbasy men osy festıvaldyń ótýine muryndyq bolǵan Nurtaı Tileýjanuly kelip qatysty. Rýhanı keshti Ulan aýdanynyń ónerpazdary ánmen árlep, dombyra shanaǵynan kúı tókti. Sóz alǵandar fotokórmeniń mańyzdylyǵyna toqtaldy.
– Salbýryn festıvali jylda dúrkirep ótedi, ketedi. Boldy, sonymen bir jylǵa umytamyz. Al mynaý kórmege qoıylǵan fotolar sáni jarasqan ónerimizdi tarıhqa qattap, bolashaqqa saqtaýdyń bir joly eken. Osy oraıda, fotosýretshilerdiń óneri erekshe ekenine kóz jetip otyr. Jalpy, munsha baılyqty fotokórmemen shektemeı, fotoalbom etip shyǵarǵanymyz jón bolady, – dep óz usynysyn da aıtty Ulan aýdandyq máslıhatynyń depýtaty, ulttyq ónerdiń janashyry Nurtaı Tileýjanuly.
Keń zalda oryn alǵan kórmeni tamashalaýǵa kelgender ár sýrettiń janynda aıaldap, oı-pikirlerimen de bólisip jatty. Qarasaq, fotosýretshiler qaıtalanbas sátterdi qalt jibermeýge tyrysqan. Biri qyrandy qolynan endi ushyrǵan sátin kadrǵa bassa, endi biri qashqan qoıandy ile bergen sátin basyp úlgergen. Iá, ár sýret shedevr. Ishinara búrkitshilerdiń portretteri de kórmeniń tórine ornalasqan. Aıtqandaı, fotokórme bir aıǵa jýyq kitaphana foıesinde turady.
О́skemen