Jıyrma besinshi márte jalaýy jelbireıtin qysqy Olımpııa oıyndarynyń da dúbiri jaqyndap keledi. Sportshylarymyz aq Olımpıada lısenzııasyna qalaı qol jetkizedi? Tórt jylda aınalyp soǵar dúbirli alamanda 1998 jyldan beri bizge altyn medal buıyrmaı tur. Ál ázir sańlaqtarǵa joldama oljalaýdyń ózi orasan jaýapkershilik júktep otyr.
Kelesi jyldyń 6-22 aqpan kúnderi Italııanyń Mılan, Kortına-d’Ampesso qalalarynda tórt jyldyqtyń basty dodasy – XXV qysqy Olımpııa oıyndary ótedi. Baıraqty básekege álemniń 93 elinen 3 500-den astam sportshy dodaǵa túsip, medal jolynda baq synaıdy. Olardyń qatarynda otandyq sportshylarymyz da bar. Qazir sańlaqtar qysqy Olımpıadaǵa qatysýǵa oraı týǵyzatyn joldamalardy oljalaý maqsatynda halyqaralyq jarystar men álem kýbogi kezeńderine qatysyp jatyr. Olımpıada lısenzııasy sol jarystardaǵy nátıjeler men jınaǵan upaı sanyna qaraı úlestiriledi. Qyr astynda turǵan qysqy alamannyń dúbiri jaqyndap keledi. Bizde ázirge tek eki lısenzııa ǵana bar. Eki joldamany mánerlep syrǵanaýshylar Mıhaıl Shaıdorov pen Sofıa Samodelkına ıelengen bolatyn. Olar ózderiniń áleýetin synap, álemdik dodalarǵa qatysýdy kózdep otyr. Mıhaıl 4-7 jeltoqsanda Japonııanyń Nagoıa qalasyndaǵy Gran-prı jarysyna, Sofıa 3-6 jeltoqsanda Horvatııa astanasy Zagrebtegi týrnırde áleýetin baǵamdap almaqshy.
Búginge deıin short-trekten elimizdiń ulttyq quramasy álemdik týrdyń kezeńderin aıaqtady. Bul sport túrinen sońǵy, ıaǵnı IV kezeń ótken aptada Nıderlandtyń Dordreht qalasynda ótti. Aldaǵy ýaqytta short-trekten Olımpıadaǵa baratyn sportshylardyń esimderi anyqtalady. Ulttyq qurama bapkerleri 4 sportshymyz lısenzııa enshileıdi dep úmit artyp otyr.
Konkımen júgirý sportynda joldamadan úmitti úzdikter 5-7 jeltoqsanda Nıderlandtyń Herenven, 12-14 jeltoqsanda Hamar qalasynda ótetin álem kýbogi kezeńderinde baq synaıdy. Frıstaıl-mogýl sportshylary 4 jeltoqsannan 2026 jyldyń 18 qańtaryna deıin Fınlıandııa, Kanada, AQSh-taǵy álem kýbogine, sondaı-aq FIS-tiń Fransııada ótkizetin halyqaralyq týrnırine qatysady. Frıstaıl-akrobatıka saıysynan synǵa túsetin sportshylarymyz 6 jeltoqsannan 2026 jyldyń 18 qańtaryna deıin álem kýboginiń bes kezeńinde baq synap, lısenzııa ıelenýge baryn salady. Álem kýboginiń kezeńderi Fınlıandııa, Qytaı , AQSh-ta ótedi. Bıatlonshylar álem kýboginiń alty kezeńi men IBU aıasyndaǵy alty halyqaralyq týrnırde sheberligin synap, kórsetkishterine qaraı joldama ıelenedi. Álem kýboginiń kezeńderi Shvesııa, Aýstrııa, Fransııa, Germanııa men Chehııada ótse, halyqaralyq týrnırlerdi Aýstrııa, Italııa, Shveısarııa, Germanııa, Slovenııa, Norvegııa elderi uıymdastyrady. Shańǵyshylar Fınlıandııa, Norvegııa, Shveısarııa, Italııada ótetin álem kýboginiń bes kezeńinde baq synasa, shańǵymen tramplınnen sekirýshiler álem kýboginiń 12 kezeńine, sondaı-aq eki ret FIS kýbogine, eki márte Aýstrııa, Germanııada ótetin, basqa da qurlyqtyq saıystarǵa qatysady. Dúbirli dodalar 20 qarashadan 2026 jylǵy 18 qańtar aralyǵynda ótedi. Ázirge otandastarymyz eki álem kýbogine qatysty. Taý shańǵysy sportshylarynyń da baıraqty básekeleri jetkilikti. Álem kýboginiń toǵyz kezeńiniń úsheýi ótti, alda alty asý bar. 12 jeltoqsan men 2026 jylǵy 25 qańtar aralyǵynda Shveısarııa, Fransııa, Aýstrııa, Chehııada jeldeı júıtkigen sańlaqtar synǵa túsedi. Shańǵy qossaıysynda álem kýboginiń alty kezeńin Fınlıandııa, Norvegııa, Aýstrııa, Germanııa elderi uıymdastyrady da, tartys 4 jeltoqsannan 2026 jylǵy 1 aqpanǵa deıin jalǵasady.
Elimizdiń sportshylaryn 2026 jylǵy basty sporttyq is-sharaǵa joǵary deńgeıde baptaý maqsatynda Týrızm jáne sport mınıstrligi sport federasııalarymen birlesip, ulttyq quramalardy daıarlaýdyń keshendi josparyn ázirledi. Oqý-jattyǵý jıyndaryn uıymdastyrý, medısınalyq, psıhologııalyq qoldaý, qarjylandyrý, qajetti sport qural-jabdyqtarymen qamtamasyz etý, tamaqtandyrý, sondaı-aq bilikti jattyqtyrýshylardy tartý isi qanshalyqty nátıjeli bolatyny Italııadaǵy aq Olımpıadada bezbendeledi.