Premer-mınıstrdiń birinshi orynbasary Roman Sklıardyń tóraǵalyǵymen kıikter popýlıasııasyn turaqty basqarýǵa qatysty ótkizilgen is-sharalardyń qorytyndylary tyńdaldy.
Keńeste Ekologııa jáne tabıǵı resýrstar mınıstri Erlan Nysanbaev, sondaı-aq basqa da memlekettik organdardyń ókilderi sóz sóıledi. Ekologııa mınıstrliginiń derekterine súıensek, eldegi kıikterdiń sany búgin rekordtyq deńgeıge jetti. Qazir 4 mln bolsa, tóldegen soń shamamen 5 mln-ǵa jetedi. Osyndaı qarqyndy ósýdi eskere otyryp, ýákiletti organdar Zoologııa ınstıtýty daıyndaǵan bıologııalyq negizdeme negizinde aýyl sharýashylyǵyna zııan keltirmeý, ekojúıelik tepe-teńdikti saqtaý maqsatynda janýarlar sanyn turaqty basqarý jóninde is-sharalar júrgizdi.
Bıylǵy 1 shildeden 30 qarashaǵa deıin 196 myńǵa jýyq kıik ushasy otandyq et óńdeý kásiporyndaryna berildi. Jumystar ǵylymı usynymdarǵa sáıkes qatań túrde júrgizildi.
Derıvattardy esepke alýǵa ári saqtaýǵa erekshe nazar aýdarylady. Kıikterdiń múıizi tańbalanyp, mınıstrlikke qarasty «Ohotzooprom» О́B» RMQK uıymynda kúsheıtilgen kúzet pen mamandandyrylǵan ınfraqurylym jaǵdaılarynda saqtalady.
Derıvattardy sıfrlyq tańbalaý men halyqaralyq retteý máseleleri jeke qaraldy. «Qazaqtelekom» AQ-men birlesip tolyq qadaǵalaýdy ári zańdy aınalymdy qamtamasyz etetin kıik múıizderin tańbalaý jobasy júzege asyrylyp jatyr. Usynylǵan júıe CITES Halyqaralyq konferensııasynda qoldaý tapty ári otandyq derıvattardyń eksportyna shekteýlerdi kezeń-kezeńimen alyp tastaýǵa negiz retinde qarastyrylady.
Jıyn qorytyndysynda Roman Sklıar Ekologııa jáne tabıǵı resýrstar mınıstrligi men basqa da múddeli memlekettik organdarǵa 2026 jylǵa kıik sanyn turaqty basqarýǵa daıyndyq boıynsha sharalar qabyldaýdy, sondaı-aq CITES sheshimderin eskere otyryp, derıvattardyń tańbalanýy men aınalymy jónindegi normatıvtik bazany qalyptastyrýdy aıaqtaýdy tapsyrdy.