Bıylǵy oraq naýqany keıingi jyldardaǵy eń nátıjeli naýqandardyń biri bolyp, Aqmola oblysyn astyqtyń jalpy jınalymy jóninen elimizdiń kóshbasshylary qataryna shyǵardy.
Ortasha ónimdilik 16,3 s/ga bolyp, oblysta 7,6 mln tonnadan astam astyq bastyryldy. Jınalǵan astyqtyń 70%-dan astamy úshinshi sanat talaptaryna saı keledi, bul óńirdiń dástúrli, jańa eksporttyq baǵyttardaǵy pozısııasyn kúsheıtedi.
Seleksııalyq «Aqmola-2», «Astana-2», «Aına» tuqymdary qoldanylǵan sharýashylyqtarda ortasha ónimdilik gektaryna 30 sentnerden asty, «Maksımovskoe» JShS-da 41,2 s/ga-ǵa jetti. Joǵary kórsetkishterge mıneraldy tyńaıtqyshtardy, elıtalyq tuqymdardy, ósimdikti qorǵaý quraldaryn keńinen qoldaný esebinen qol jetkizildi.
Aqmola oblysy egis alqaptaryn ártaraptandyrý jóninen de kóshbasshylar qatarynda. Bıyl maıly daqyldar alqaby alǵash ret 500 myń gektarǵa jetti, bul ótken jylmen salystyrǵanda 2,5 ese kóp. Budan bólek, jyl basynan beri oblysta 1 trln teńgeniń aýyl sharýashylyǵy ónimi óndirildi. Jyl qorytyndysynda óndiris kólemi 1,2 trln teńge deńgeıinde bolady dep kútilip otyr.
О́ńirde aýyl sharýashylyǵy ónimderiniń tereń óńdeý úlesin arttyrý maqsatynda halyqaralyq kompanııalardyń qatysýmen birqatar iri jobalar júzege asyrylyp jatyr. Solardyń biri – álemdik «Dalian Hesheng Holdings» holdıngi tarapynan júzege asyrylatyn astyqty tereń óńdeý zaýytynyń qurylysy. Sheteldik ınvestısııalar kólemi 1,8 mlrd dollar, óńdeý qýaty jylyna 3 mln tonnaǵa deıin jetedi. Jobany 2028 jyly iske qosý josparlanyp otyr. Bıylǵy qazan aıynda Shortandy aýdanynda «Hopefull Grain» kompanııasynyń taǵy bir astyqty tereń óńdeý keshenin salý jóninde strategııalyq kelisimge qol qoıyldy. Investısııa kólemi – 1,5 mlrd dollar. Esil aýdanynda bıdaı óńdeý, jem óndirý zaýyttaryn, sondaı-aq elevator men qurama jem zaýytyn salý josparlanyp otyr.