Senat tóraǵasy Máýlen Áshimbaev Qasıetti Taqtyń elimizdegi Apostoldyq nýnsıi Djordj Djordj Panamtýndılmen kezdesti. Onda rýhanı dıplomatııany ilgeriletý men halyqaralyq seriktestikti keńeıtý máseleleri talqylandy.
Senat tóraǵasy Apostoldyq nýnsıge iltıpat bildire kelip, keıingi jyldarda Qazaqstan men Qasıetti Taq arasyndaǵy kópjaqty baılanys aıtarlyqtaı jandanyp, jańa deńgeıge kóterilgenin, elimiz ony odan ári nyǵaıtýǵa múddeli ekenin atap ótti. Sondaı-aq ol Prezıdenttiń Vatıkanǵa resmı sapary ekijaqty yntymaqtastyqtyń damýyna tyń serpin bergenin aıtty.
– Elimiz Qasıetti Taqpen aradaǵy júıeli túrde keńeıip kele jatqan tyǵyz qarym-qatynasqa únemi basa mán beredi. Joǵary deńgeıdegi turaqty baılanystar Qazaqstan men Vatıkan arasyndaǵy dostyq qarym-qatynastyń berik negizin qamtamasyz etedi. Memleket basshysy byltyr Vatıkanǵa resmı sapary kezinde Qazaqstan shynaıy dostyqqa, kelisim men ózara qurmetke negizdelgen Qasıetti Taqpen aradaǵy burynnan kele jatqan seriktestik baılanystardy joǵary baǵalaıtynyn atap ótti. Jaqynda Qasıetti Taq janynda Qazaqstan elshiliginiń ashylýy ekijaqty yntymaqtastyqty ári qaraı nyǵaıtýdy kózdeıtin shynaıy nıetimizdiń jarqyn kórinisi ekeni anyq», dep M.Áshimbaev Qasıetti Taqtyń Apostoldyq nýnsıine dıalog pen yntymaqtastyqty arttyrýǵa qosqan úlesi úshin alǵys bildirdi.
Sonymen qatar palata spıkeri Álemdik jáne dástúrli dinder kóshbasshylary seziniń ıdeıalaryn jan-jaqty jáne dáıekti qoldaǵany úshin Vatıkan tarapyna alǵys aıtty. Kezdesýde sezdiń birlesken kúsh-jigerdiń arqasynda dinder arasyndaǵy ózara túsinistik pen syılastyqty nyǵaıtýǵa arnalǵan irgeli alańǵa aınalǵany aıtyldy. Sondaı-aq Senat tóraǵasy qazirgi syn-qaterlerdi eńserý jolynda rýhanı dıplomatııanyń mańyzyna toqtalyp, elimizdiń konfessııaaralyq kelisimdi damytý men jahandyq dinaralyq dıalogti ilgeriletýge arnalǵan bastamalarǵa toqtaldy.
– Álemdik jáne dástúrli dinder kóshbasshylarynyń VIII seziniń kún tártibi ózekti ári mazmundy boldy. Biz BUU О́rkenıetter Alıansymen birlesip, dinı nysandardy qorǵaý jóninde arnaıy sessııa ótkizdik. Odan bólek, Jas dinı lıderlerdiń ekinshi forýmy uıymdastyryldy. Atalǵan is-sharaǵa túrli dinı konfessııalardyń ókilderi, ǵalymdar, sarapshylar qatysty. Sezd aıasynda qazirgi halyqaralyq qatynastardaǵy rýhanı dıplomatııanyń róline arnalǵan saraptamalyq dóńgelek ústel de ótkizildi. Osyndaı bastamalardyń bári mádenıetter men dinderdiń jaqyndasýyna aıtarlyqtaı úles qosty deýge tolyq negiz bar, – dep M.Áshimbaev aldaǵy birlesken jumystyń basym baǵyttaryn atap ótti.
Djordj Panamtýndıl de Qasıetti Taq Qazaqstannyń beıbit bastamalaryn tolyq qoldaıtynyn aıtty. Sonymen qatar ol toleranttylyq, úılesimdilik pen baýyrlastyq ıdeıalaryn dáripteýge múddeli ekenin málimdedi.
Kezdesýde buǵan qosa densaýlyq saqtaý, ǵylym, mádenıet, basqa da birqatar saladaǵy baılanystardy keńeıtý máseleleri de talqylandy.