Almatydaǵy M.Áýezov atyndaǵy kitaphanada ádebıet zertteýshi, fılologııa ǵylymynyń kandıdaty Mamaı Qanıuly Ahetovtiń «Qazaqtyń sheshendik óneri» atty úsh tomdyq kólemdi ǵylymı eńbeginiń tusaýkeseri ótti, dep jazady Egemen.kz.
Saltanatty sharanyń shymyldyǵyn Qazaqstan Jazýshylar odaǵy Basqarmasynyń Tóraǵasy Mereke Qulkenov ashyp, qazaqtyń sóz óneriniń tereń tamyry men rýhanı arnalaryna boılaǵan eńbektiń mán-mańyzyna toqtaldy. Odaq tóraǵasy kitaphanaǵa Muhtar Áýezov esimi berilgennen bergi alǵashqy tusaýkeserdiń dál osy zertteý eńbegine buıyrýyn sımvoldyq qubylys dep baǵalady.
– Mamaı Ahetov – Áýezov murasyn uzaq jyldar boıy tereń zerttep kele jatqan zerdeli ǵalym. Úsh tomdyq eńbekte qazaq sheshendik óneriniń tarıhy, genezısi, tıpologııasy men poetıkasy keshendi túrde qarastyrylǵan. Álemdik rıtorıka men qazaq sheshendik dástúrin salystyra otyryp, halqymyzdyń sóz mádenıetiniń tereńdigi men tamyryn ashyp kórsetken. Úsh tomdyqta sheshendik ónerdiń kóne dáýirden búginge deıingi sabaqtastyǵy, Anaharsısten bastap Ábish Kekilbaev, Nurlan Orazalınge deıingi tulǵalardyń sóıleý mádenıeti, Temirbek Júrgenovtiń rıtorıkalyq sheberligi, sondaı-aq álemdik kóshbasshylardyń sheshendik úlgileri tereń taldanǵan. Sondyqtan bul eńbek qazirgi basshylyqtaǵy tulǵalardyń da, jas zertteýshilerdiń de ústelinde turýǵa tıis, – dedi Mereke Qulkenov.
Ol sondaı-aq atalmysh úsh tomdyqty «Ál-Farabı atyndaǵy memlekettik syılyqqa» usyný jóninde usynys bildirdi.
Is-shara barysynda Almaty qalasy Mádenıet basqarmasynyń basshysy Danııar Álıev, ǵalym, synshy, ádebıettanýshy Qanseıit Ábdezuly, jyrshy ári folklortanýshy Berik Júsip, «Qazaq ádebıeti» gazetiniń bas redaktorynyń orynbasary Qalı Sársenbaı, jazýshy Júsipbek Qorǵasbek syndy zııaly qaýym ókilderi sóz sóılep, eńbektiń ǵylymı jáne rýhanı mańyzyn atap ótti. Kesh sońyn jazýshy Qýandyq Túmenbaı qorytyndylap, eńbektiń ulttyq rýhanııatqa qosylǵan zor úles ekenin atap ótti.