Astanadaǵy medısınalyq uıymdarda, onyń ishinde jekemenshik klınıkalarda pasıentter mindetti áleýmettik medısınalyq saqtandyrý (MÁMS) aıasynda sapaly oftalmologııalyq kómek ala alady. Bul tek mamandardyń keńesterin ǵana emes, kózge jasalatyn joǵary dáldiktegi operasııalardy da qamtıdy, dep habarlaıdy Egemen.kz qala ákimdiginiń baspasóz qyzmetine silteme jasap.
Jeltoqsan aıynyń basynda qala klınıkalarynyń birinde 69 jastaǵy pasıentke ota jasaldy. Ota aldynda onyń kóz burshaǵynyń baılanystyrǵysh tinderinde álsizdik anyqtalǵan, bul operasııany qıyndatýy múmkin edi. Budan bólek, kataraktamen qatar pasıentten glaýkoma da anyqtalǵan. Soǵan qaramastan operasııa sátti ótti.
Oftalmohırýrg Ásııa Ábilhakimovanyń aıtýynsha, mundaı operasııalar ádette aýyrtpalyqsyz ótedi, nebári 15-20 mınýtqa sozylady jáne mindetti áleýmettik medısınalyq saqtandyrý aıasynda júrgiziledi.
«Kóbinese jasy úlken naýqastar katarakta boıynsha júginedi. Sonymen birge MÁMS boıynsha táýlik boıy stasıonarda vıtreoretınaldy operasııalar, ıaǵnı torqabyqtyń ajyraýy nemese jyrtylýy kezinde medısınalyq kómek kórsetemiz», dedi Ásııa Ábilhakimova.
Dárigerdiń aıtýynsha, kataraktany myna belgiler arqyly anyqtaýǵa bolady: adamnyń buryn anyq ári jaryq kórgen zattardy keıinirek tuman nemese býlanǵan áınek arqyly kórgendeı qabyldaýy.
Onyń sózinshe, alǵashqy belgiler baıqalǵan sátte-aq mamanǵa qaralý qajet, sebebi kataraktany bastapqy kezeńde ota jasaý hırýrg úshin de, pasıent úshin de áldeqaıda jeńil, ári qalpyna kelý ýaqyty tez bolady.
Keminde jylyna bir ret dıagnostıkadan ótip, kórý qabiletin teksertip turý qajet.