Batys Qazaqstan oblysynyń Shyńǵyrlaý aýdandyq aýrýhanasy kúrdeli jóndeýden ótip, halyq ıgiligine qaıta berildi. Osydan jarty ǵasyr buryn salynǵan ǵımarat jańa keıipke kelip, aýdan halqyn qýanyshqa bóledi.
Shyńǵyrlaýdaǵy aýrýhana ǵımaraty 1976–1977 jyldary boı kóterip, sol kezde Oral oblysyndaǵy eń úlken aýdandyq nysan atanǵan eken. 180 kereýettik aýrýhana 30 myńnan asa turǵyny bar aýdanǵa qaltqysyz qyzmet kórsetken. Sońǵy jóndeý jumysy 2008 jyly júrgizilgenimen, odan beri de biraz jyl jyljyp ótti. Eskire bastaǵan emdeý ornyn qaıta jańǵyrtý aýdan halqynyń kópten aıtylyp júrgen tilegi-tuǵyn. Sodan da bolar, «Amanat» partııasynyń 2023–2027 jyldarǵa arnalǵan «Halyqpen birge» saılaýaldy baǵdarlamasyna Shyńǵyrlaý aýrýhanasyn kúrdeli jóndeý máselesi de kirgen edi. Mine, halyq tilegi oryndaldy.
«Qarashyǵanaq Petroleým Opereıtıng b.v.» kompanııasy «Áleýmettik jaýapkershilik sheńberi» baǵdarlamasy aıasynda qarajat bólip, «BatysKotloMontaj» fırmasynyń qurylysshylary tapsyrysty jiti, sapaly, uqypty oryndap shyqty.
– Halyq densaýlyǵy – el damýynyń basty qundylyǵy. Medısına salasyn qoldaý, emdeý mekemeleriniń jaǵdaıyn jaqsartý – árbir azamattyń ómir sapasyna tikeleı áser etetin asa mańyzdy is. Osynyń negizinde Shyńǵyrlaý aýdanynda ortalyq aýdandyq aýrýhananyń stasıonar ǵımaraty tolyq kólemde kúrdeli jóndeýden ótkizilip, halyq ıgiligine qaıtadan paıdalanýǵa berildi, – dedi nysannyń ashylý saltanatyna arnaıy kelgen Batys Qazaqstan oblysy ákiminiń orynbasary Tilepbergen Qaıypov.
Jańarǵan aýrýhana ǵımaratynda hırýrgııa, terapııa, balalar, jan saqtaý bólimderi, perzenthana, zerthana, sondaı-aq as ázirleıtin bólim men dárihana tolyqtaı kúrdeli jóndelip, aýrýhana bastan-aıaq zamanaýı medısınalyq jabdyqtarmen qamtyldy. Mekeme basshysy Qylysh Jazyqbaevtyń aıtýynsha, mundaǵy jabdyqtar, jańartylǵan bólimder halyqqa sapaly ári qoljetimdi qyzmet kórsetýge tolyq múmkindik beredi. Osylaısha, óńirdegi densaýlyq saqtaý ınfraqurylymy aıtarlyqtaı jaqsardy.
Aýrýhananyń ashylý saltanatyna «Qarashyǵanaq Petroleým Opereıtıng b.v.» kompanııasynyń áleýmettik jáne ınfraqurylymdyq jobalar bóliminiń menedjeri Qaırat Bımaǵanbetov, oblystyq densaýlyq saqtaý basqarmasy basshysynyń orynbasary Aınash Ǵubaıdýllına, «Amanat» partııasy BQO fılıaly atqarýshy hatshysynyń orynbasary Afıza Semǵalıeva, Shyńǵyrlaý aýdanynyń ákimi Murat О́mirálıev qatysty. Saltanatqa aýdandyq aýrýhanada ár jyldary basshylyq etken bas dárigerler de shaqyrylǵan eken. Ardager dáriger Qozykesh Omarov bastaǵan bir top maıtalman maman biri Oraldan, biri Aqtóbeden arnaıy kelip, eldiń qýanyshyna ortaqtasty. Meımandar aýrýhana aýlasyna kóshet egip, estelik qaldyrdy.
Aýdan turǵyndary jańarǵan aýrýhanany aralap kórip, ishki-syrtqy kórinisine qatty rıza boldy. Degenmen osy kúndi eń taǵatsyzdana kútkender aýrýhana ujymy bolsa kerek. Qurylys jumysy bastalǵan erte kóktemnen búginge deıin jaısyz jerde júrse de halyqqa úzdiksiz medısınalyq qyzmet kórsetken ujymnyń eńbegi zor. Memlekettiń shynaıy qamqorlyǵyn kórgen aq jeleńdi abzal jandardyń jumysy endi burynǵydan da sapaly bola túsedi.
Shyraıy kirgen Shyńǵyrlaý aýrýhanasy Aqjaıyq óńiri halqynyń áleýmettik ahýalyn jaqsartatyn keshendi jumystyń bir kórinisi ǵana. Tilepbergen Ersaıulynyń aıtýynsha, oblysta sońǵy kezde 50-ge jýyq jańa medısınalyq nysan salynǵan. Dál osy Shyńǵyrlaý aýdanynda jańa temirjol vokzaly boı kóteredi. Aýdannyń Aqtaý, Ardaq, Almaz aýyldarynda bıyl jańadan veterınarlyq pýnktter ashylyp, mal dárigerlerine jańa 5 «Nıva» avtokóligi berildi. «Turǵyn úı-kommýnaldyq sharýashylyǵyn damytý» baǵdarlamasy aıasynda 338 mln teńge ıgerilip, Segizsaı aýylynda sý qubyry tartyldy. Nátıjesinde, aýdan halqynyń aýyzsýmen qamtylý deńgeıi 100%-ǵa jetti. Aýdanda 990 shaǵyn jáne orta bıznes nysany tirkelgen, onyń 942-si belsendi jumys isteıdi.
– Bul – aýdanymyzdaǵy kásipkerliktiń turaqty damýynyń jáne turǵyndarymyzdyń iskerlik belsendiliginiń aıǵaǵy, – deıdi aýdan ákimi M.О́mirálıev.
Batys Qazaqstan oblysy