Sozaq aýdanynda bilim berý ınfraqurylymyn damytý baǵytyndaǵy mańyzdy bastamalardyń biri – «Keleshek mektepteri» ulttyq jobasy aıasynda ashylǵan Y.Altynsarın atyndaǵy 900 oryndyq jalpy bilim beretin mektep. Osy jyldyń 1 sáýirinen bastap óz jumysyn bastaǵan bul bilim oshaǵy búginde aýdannyń eń zamanaýı ári mártebeli mektepteriniń birine aınaldy, dep jazady Egemen.kz.
Aýdandaǵy 35 mekteptiń ishinde jańa formattaǵy, keń aýqymdy múmkindiktermen jabdyqtalǵan bul mektep bilim sapasyn arttyrýǵa, qaýipsiz ári jaıly orta qalyptastyrýǵa baǵyttalǵan. Oqý ǵımaraty ulttyq standarttarǵa saı salynyp, zamanaýı pán kabınetterimen, sıfrlyq tehnologııalarmen jáne oqýshy qajettilikterine beıimdelgen keń oqý alańdarymen qamtamasyz etilgen.
Sozaq aýdanynyń bilim berý júıesi búginde turaqty damý jolynda. Aýdanda 3-6 jastaǵy balalardy mektepke deıingi tárbıemen qamtý 100 paıyzǵa jetken, mektepterdiń barlyǵy ınternetpen tolyq qamtamasyz etilgen. Mundaı kórsetkishterge qol jetkizýde Keleshek mekteptiń ashylýy bilim salasyndaǵy júıeli ózgeristerdiń naqty kórinisi deýge bolady.
Sozaq aýdanynyń bilim bólimi basshysy Abaı Sháripbekuly jańa mekteptiń mańyzyna erekshe toqtaldy:
«Keleshek mektepteri – bul tek jańa ǵımarat emes. Bul – bolashaq urpaqtyń sapaly bilim alýyna jasalǵan strategııalyq qadam. Y.Altynsarın atyndaǵy mektep aýdandaǵy úzdik bilim ordalarynyń birine aınalatynyna senimimiz mol. Munda balalardyń jan-jaqty damýyna, zamanaýı bilim alýyna barlyq jaǵdaı jasalǵan. Bul – Memleket basshysynyń bilim salasyna bergen tapsyrmalarynyń Sozaq aýdanynda naqty júzege asyp otyrǵanynyń aıqyn dáleli. Qazirgi tańda «Keleshek mektepteri» jobasynyń arqasynda oqý úlgerimi kórsetkishterinde oń ózgerister baıqalýda. Oqýshylardyń pándik saýattylyǵy, zertteýshilik daǵdylary, fýnksıonaldyq oqý kórsetkishteri jyl saıyn ósip keledi. Bul – jobanyń tıimdiliginiń naqty dáleli», dedi bilim bóliminiń basshysy.
Aıta keteıik, 2025-2026 oqý jylynda aýdan boıynsha 15 470 oqýshy bilim alýda, al jańa oqý formatyndaǵy mekteptiń iske qosylýy oqýshy oryndarynyń tapshylyǵyn azaıtyp, ata-analar úshin de úlken qolaılylyq týǵyzdy.
Mamandardyń aıtýynsha, Keleshek mektep tek búginniń emes, erteńniń de suranysyna jaýap beretin bilim ordasy retinde aýdannyń bilim sapasyn jańa deńgeıge kótermek. Bul mektep – Sozaqtyń bolashaǵyna salynǵan berik irgetas.