Keshe Joǵarǵy Sot Tóraǵasy Qaırat Mámı Atyraýǵa arnaıy kelip, Elbasy Jarlyǵymen oblystyq sottyń tóraǵasy bolyp taǵaıyndalǵan Marǵulan Bekturǵanovty ujymǵa tanystyrdy.
– Marǵulan Jubanyshuly – kásibı sýdıa, ári tájirıbeli basshy. Aýdandyq sottyń tóraǵasy, oblystyq sot alqasynyń tóraǵasy qyzmetterin atqardy. Munyń aldynda Jambyl oblystyq sotynyń tóraǵasy laýazymynda boldy. Sot júıesindegi qyzmettik ótili 17 jyldan asady, –deı kele Joǵarǵy Sot Tóraǵasy Qaırat Mámı onyń Jambyl oblystyq sotynyń jumysyn oblystyq sottar reıtinginde úshinshi orynǵa kótergenine toqtaldy. Endi Atyraý oblystyq sotyn basqarýda da osyndaı tabysqa jetýine senim bildirdi. Al burynǵy tóraǵa Muhtar Smaǵulovtyń Pavlodar oblystyq sotyna basshylyq jasaıtynyn habarlady.
Sonymen birge, sýdıalar aldynda turǵan mindetterdi saralap, kemshilikterge keńdik jasalmaıtynyn jetkizdi. Máselen, ótken jyly Atyraý oblysyndaǵy aýdandyq sottardyń 9 isi buzylǵan. Úsh sýdıa tártiptik jaýapkershilikke tartylypty. Atyraý oblysynan Joǵarǵy Sotqa túsetin shaǵymdardyń 82 paıyzy ekonomıkalyq sottyń tóraǵasy men sýdıalaryna qatysty bolǵan. Tipti, zańda kózdelmegen sanksııa salý da oryn alǵan. «Aldaǵy ýaqytta mundaı kemshilikter oryn almaýy tıis», dedi Qaırat Mámı.
Joldasbek ShО́PEǴUL,
«Egemen Qazaqstan».
Atyraý oblysy.