Keshe Premer-Mınıstrdiń birinshi orynbasary Baqytjan Saǵyntaev arendalyq turǵyn úı qurylysy máseleleri boıynsha selektorlyq rejimde keńes ótkizdi, dep habarlady Premer-Mınıstrdiń baspasóz qyzmeti.
Keńes barysynda ortalyq atqarýshy organdardyń, «Báıterek» UBH» AQ-tyń, oblystardyń, Astana jáne Almaty qalalarynyń ákimderi osy baǵytta atqarylyp jatqan jumystar týraly baıandady.
Eske sala keteıik, Memleket basshysy «Nurly Jol – bolashaqqa bastar jol» atty Qazaqstan halqyna Joldaýynda Úkimetke áleýmettik arendalyq turǵyn úı salyp, ony eń tómengi paıyzben jáne satyp alý quqymen halyqqa berýdi tapsyrǵan bolatyn.
«Nurly Jol» baǵdarlamasy sheńberinde turǵyn úıdi salýǵa jáne satyp alýǵa 250 mlrd. teńge baǵyttalatyn bolady. Jalpy kólemi 1 483 myń sharshy metr bolatyn 29 myń páter salý jáne qurylys salýshylardan olardy satyp alý josparlanyp otyr.
Osy jyldyń naýryzynda-aq Astana, Almaty, Kókshetaý, Semeı, Qostanaı qalalarynda jalpy kólemi 76,5 myń sharshy metr bolatyn alǵashqy 1 357 páter paıdalanýǵa berilmek. Barlyǵy bıylǵy jyly 78,7 mlrd. teńge somaǵa, jalpy alańy 505,3 myń sharshy metr bolatyn 8 616 páter salynady jáne satyp alynady.
Talqylaý qorytyndysy boıynsha, Baqytjan Saǵyntaev «Báıterek» UBH» AQ-qa oblystardyń, Astana jáne Almaty qalalarynyń ákimderimen birlesip, qurylystyń ýaqytyly aıaqtalýyn jáne turǵyn úıdiń kezekte turǵandarǵa bólinip berilýin qamtamasyz etýdi tapsyrdy.