Tahaýı Ahtanov atyndaǵy Aqtóbe oblystyq drama teatrynyń ártisteri Fransııaǵa gastroldik saparmen baryp, Parıjde «Qobylandy batyr» qoıylymyn sahnalady. Horeografııalyq elementtermen, erekshe kóz tartarlyq kostıýmdermen, dombyra men qobyzdyń daýysymen kórkemdelgen qoıylym kórermenderge erekshe kóńil-kúı syılady. IýNESKO janyndaǵy Qazaqstannyń Turaqty ókili Asqar Ábdirahmanov pen Fransııadaǵy Qazaqstannyń Tótenshe jáne ókiletti elshisi Gúlsara Arystanqulova qoıylymǵa arnaıy kelip qatysty, dep habarlaıdy Egemen.kz.
Qobylandy rólin somdaǵan Ádilet Muhtar eldiń taǵdyry talqyǵa túsken kezeńdegi minezi, ishki bolmysy, kóńil-kúıi, jeńisi men qatelesken tustary arqyly ortaǵasyrlyq batyr tabıǵatyn barynsha ashýǵa tyrysqan. Onyń janyndaǵy –Toqtarbaı (Keńes Kemalbaev), Analyq (Aıgúl Orazalına), Estemis (Elaman Dosjanov), Qarlyǵa (Ajar Járdenbekqyzy), Qarlyǵash (Fatıma Berdibekova), Qurtqa (Arýjan Bazarbaeva) Qobylandy beınesin tolyqtyryp tur. Sahnadaǵy Alshaǵyr, Kóbikti, Kóklan, Qaraman men Qazan obrazdary da ár qyrynan somdalǵan. Sol zamannyń únin jetkizýshi aqyn (Abzal Qudaıbergenov) arqyly qoıylymnyń ıdeıasy men kompozısııasy tutasqan.
Bul Parıj kórermenderine ortaǵasyrlyq qypshaq dalasy keıipkerleriniń tabıǵaty men bolmysyn, minezi men ómir saltyn túsinýge tez jol ashady. Spektakldiń qoıýshy rejısseri – Dına Jumabaeva, qoıýshy sýretshisi Lılııa Hısmatýllına. Keıipkerler kıimderi, qımyl qozǵalystary qobyz sarynymen úndesip, Qobylandy ómir súrgen zamandaǵy dala zańyna baǵynǵan qoǵamnyń ómir súrý saltyn kórkemdeıdi.
«T. Ahtanov atyndaǵy oblystyq drama teatry ártisteriniń sapary Aqtóbe oblysy ákimdiginiń qoldaýymen iske asyryldy. Álemdik sahnada óner kórsetý bizdiń ártisterimizge úlken tájirıbe boldy. Aıta ketý kerek, bıletter aldyn ala tez satylyp ketti. Adam kóp jınaldy. Qoıylym ózin ózi aqtady», deıdi oblystyq mádenıet basqarmasynyń basshysy Altynaı Iýnısova.
Aqtóbe oblysy