Búgin Shymbulak taý kýrortynyń qysqy maýsymy ashylýyna oraı baspasóz týry ótti. Jýrnalısterge kýrorttyń servısi men ınfraqurylymynyń jańǵyrtylýy tanystyryldy, dep jazady Egemen.kz.
О́tken maýsymda Shymbulak 1,5 mıllıonnan astam qonaqty qabyldady. Bul – rekordtyq kórsetkish. Osylaısha, kýrort 2030 jylǵa qaraı kózdelgen mejege merziminen buryn qol jetkizdi. Týrıster sanynyń ósýi ınjenerlik júıelerdi, servısti únemi jańǵyrtýdy jáne qaýipsizdik standarttaryn arttyrýdy talap etetini anyq.Qaıta jańǵyrtýdan keıin syrǵanaý jabdyqtaryn jalǵa berý men saqtaýdyń negizgi aımaǵy da jańartyldy. Jalǵa berý qyzmetiniń sýpervaızeri Múslim Jumaev qyzmet kórsetý «bir tereze» qaǵıdatymen iske asatynyn, al lokerler sany eki esege artqanyn atap ótti.
«Qonaqtardyń qatary jyl saıyn artyp keledi, sondyqtan basty mindetimiz – syrǵanaýǵa deıingi uıymdastyrý rásimderine ketetin ýaqytty qysqartý. Negizgi jalǵa berý aımaǵy qazir “Medeý” stansııasynda ornalasqan, al “Shymbulaq” stansııasynda kásibı raıderlerge arnalǵan lokerler men jalǵa berý núktesi jumys isteıdi. Bul qarbalas ýaqytta qyzmet kórsetýdi jedeldetýge múmkindik beredi. Taǵy bir jaqsy jańalyq – osy maýsymda taý shańǵysy jabdyqtary tolyq jańartyldy», dedi Múslim Jumaev.
2025–2026 jylǵy syrǵanaý maýsymynda kýrortta servısti sıfrlyq baqylaý júıesi engizildi. Qonaqtar ınfoortalyqtarda, taý shańǵysy men snoýbord mektebinde, sondaı-aq kýrorttyń saıtynda ornalasqan QR-kodtar arqyly ótinishter men usynystaryn joldaı alady.
«Qonaqtardyń pikirin jınaý men taldaýdy avtomattandyrdyq. Bul kýrort qyzmetin obektıvti baǵalaýǵa, jetildirýdi qajet etetin tustarymyzdy jedel anyqtaýǵa jáne qyzmet sapasyn júıeli túrde kúsheıtýge múmkindik beredi», dedi Klıenttik servıs jáne sapany baqylaý departamentiniń basshysy Olga Belıaeva.
Jańa maýsymda sanıtarlyq ınfraqurylymdy damytýǵa da erekshe kóńil bólingen. Kýrorttyń negizgi aımaqtarynda, sonyń ishinde 3200 metr bıiktegi jáne adam kóp shoǵyrlanatyn stansııalarda dárethanalar jańartyldy.
Baspasóz týry barysynda jańartylǵan ratrak parki, jasandy qar jasaý júıeleri jáne aspaly joldardyń jumysyn kórsetildi. Osy maýsymda Shymbulak Eýropa, Azııa jáne Latyn Amerıkasyndaǵy kýrorttardy basqaratyn halyqaralyq PGI Management kompanııasymen yntymaqtastyqty júzege asyrmaq.
Sondaı-aq kýrort «Ile-Alataý» memlekettik ulttyq tabıǵı parkimen birlesip, Kishi Almaty shatqalyndaǵy Tıan-Shan shyrshalaryn qalpyna keltirý maqsatynda Shyrshaly aýmaǵynda jobasyn qolǵa aldy. Bıyl kýrort aýmaǵynda 500 kóshet otyrǵyzyldy.
Derekterge sáıkes, 2025 jyldyń qańtar-qarasha aılary aralyǵynda sheteldik týrıster arasynda eń tanymal meken retinde Shymbulak atalǵan. Týrısterdiń 30,62%-y kýrortqa barýdy yqylas tanytqan. Qoryta aıtqanda Almatyǵa kelgen árbir úshinshi sheteldik qonaq Shymbulak kýrortyna barǵan.