Japonııa tarapynan Qazaqstanmen sıfrlandyrý, jasandy ıntellekt, sıfrlyq ınfraqurylymdy damytý jáne ınnovasııalyq tehnologııalardy engizý salalarynda yntymaqtastyqqa qyzyǵýshylyq baıqalyp otyr, dep habarlaıdy Egemen.kz.
Bıyl qarasha aıynda Qazaqstan tarapymen ótken dıplomatııalyq kezdesý barysynda Japonııanyń sıfrlandyrý mınıstri H.Masýmoto Qazaqstandaǵy sıfrlyq transformasııanyń qarqynyn joǵary baǵalap, eldiń zamanaýı sıfrlyq ekojúıe qalyptastyrý baǵytynda jasap jatqan qadamdary jahandyq úrdisterge saı keletinin jáne Japonııamen ózara tıimdi yntymaqtastyq úshin keń múmkindikter ashatynyn atap ótti.
Biryńǵaı ekojúıe qalyptastyrý maqsatynda sýperkompıýterlik klaster iske qosylyp, Alem.ai halyqaralyq jasandy ıntellekt ortalyǵy ashyldy. Qazaqstan bul salada Japonııamen yntymaqtastyqqa, onyń ishinde Ortalyq Azııada qaýipsiz ári senimdi jasandy ıntellekt ekojúıesin birlesip qurýǵa múddeli.
Sondaı-aq ótken jyly Japonııanyń Ǵylym jáne tehnologııalar agenttigi (JST) qorshaǵan ortany qorǵaý, energetıka jáne apattardyń saldaryn boldyrmaý sııaqty basym baǵyttardy qamtıtyn halyqaralyq baǵdarlamany iske qosqanyn atap ótken jón. Konkýrstyq irikteý nátıjesinde 64 ótinimniń ishinen 10 ǵylymı joba tańdap alynǵan.
Irikteýden ótken jobalardyń biri – ekologııalyq turǵydan qaýipsiz ári tehnologııalyq jaǵynan zamanaýı taý-ken óndirisin damytýǵa baǵyttalǵan qazaq-japon ǵylymı jobasy «Next-generation Smart Mining Plus for Sustainable Resources Development».
Joba 2030 jylǵy 31 naýryzǵa deıin eseptelgen, onyń qarjylandyrý kólemi 3,2 mln AQSh dollaryn quraıdy. Joba sheńberinde «aqyldy» tehnologııalardy, ekologııalyq monıtorıng júıelerin jáne sıfrlyq sheshimderdi engizý, sondaı-aq Nazarbaev Ýnıversıteti bazasynda jabdyqtaý men kadrlardy daıarlaýdy qosa alǵanda, ǵylymı-bilim berý áleýetin damytý kózdelgen.