Qysta muz qatpaı turyp ózen-kólderge shyqqandar aıyppul tóleıdi

Tótenshe jaǵdaı ókilderi bizdi adam ómiri alańdatady deıdi. Sebebi Astanada sý aıdyndarynda juqa muzǵa shyǵyp, óz ómirin qaterge tigetinder kóp eken. Sondyqtan elordalyq Tótenshe jaǵdaılar departamentiniń qyzmetkerleri kún saıyn reıdke shyǵyp, muz ústindegi qaýipsizdik talaptaryn turǵyndarǵa túsindirip júr eken. Olar 1 jeltoqsannan bastap túsindirý jumystaryn júrgizip júr eken. 

– Esil ózeniniń boıynda muz ústine shyǵyp, balyq aýlaıtyn azamattarmen turaqty profılaktıkalyq reıdter júrgizilip keledi. Reıd barysynda muzdyń naqty qalyńdyǵy ólshenip, qaýip tóndiretin aýmaqtar arnaıy belgilenedi. Balyqshy qutqarý jabdyqtarymen jabdyqtalýy kerek. Ol qutqarý jeleti, arqanyn ala shyǵýy kerek. Azamat qaýipsizdik erejelerin buzǵan jaǵdaıda bizdiń tótenshe jaǵdaı departamentimen ákimshilik quqyq buzýshylyq kodeksiniń 412 babyna sáıkes, ákimshilik jaýapkershilikke tartylady, – dedi departament basshysynyń orynbasary Danııar Tájibaev.

Qutqarýshylar kún saıyn tańǵy 08:00-den keshki 20:00-ge deıin Esil ózenin aralaıdy. Atalǵan jumysqa tájirıbeli mamandar da tartylǵan. Solardyń biri Seıilbek Naqypov. Ol tótenshe jaǵdaıdar departamentinde 20 jyldan astam ýaqyt qyzmet etip keledi. 

– Muzdyń ústimen konkımen júrgendeı qozǵalý kerek. Tikeleı, jaıaý adam sııaqty emes, syrǵanap qımyldaǵan durys. Sonda muz astyna túsip ketý qaýpi azaıady. Al eger adam muz astyna túsip ketse, eńbektep qatty muz jatqan jaqqa qaraı shyǵýy kerek. Áıtpese qaıtadan opyrylyp ketýi múmkin, – dedi bas qutqarýshy Naqypov. 

Mamandardyń aıtýynsha, turǵyndardyń jaıaý júrýi úshin muzdyń qalyńdyǵy keminde 10 santımetrden kóp bolýy qajet. Al balyq aýlaý kezinde talap odan da qatań. Muzdyń qalyńdyǵy keminde 25 santımetr bolýy shart. Mundaı tekseristerdiń basty maqsaty – qys mezgilinde qaıǵyly jaǵdaılardyń aldyn alý. Qutqarýshylar turǵyndarǵa juqa muzǵa shyqpaýǵa, qaýipsizdik talaptaryn qatań saqtaýǵa jáne tótenshe jaǵdaıda 112 nómirine habarlasýǵa shaqyrdy.