Prezıdent úılesimdi qala keńistigin qalyptastyrýǵa aıryqsha mán berý qajettigin jáne azamattardyń turmys-tirshiligi men jumysyna barynsha qolaıly jaǵdaı jasaý barlyq deńgeıdegi ákimderdiń basty mindeti bolýǵa tıis ekenin aıtty. Bul týraly Memleket basshysy Astanany damytý jónindegi keńeste toqtaldy, dep habarlaıdy Egemen.kz Aqordanyń baspasóz qyzmetine silteme jasap.
«Al elorda zamanaýı ýrbanıstıkanyń úlgisi bolýy kerek. О́ıtkeni onyń mártebesi bólek.
Bul oraıda Astanada qazirdiń ózinde birshama nátıjege qol jetkizdik. Qalalyq ortany damytýdyń biryńǵaı tásili aıqyndaldy.
Muny bıyl jazda elimizde ótken sammıtter kezinde ózge de memleketter basshylary baıqaǵan.
Mysaly, Tóraǵa Sı Szınpın qalamyzdyń kelbeti aıtarlyqtaı jaqsarǵanyn aıtyp, joǵary baǵasyn berdi. Bul – álemdik iri derjavalardyń basshylary Qazaqstanǵa kelgende bizdiń qalalarymyzdyń kelbetine mán berip qaraıdy degen sóz. Muny qaperde ustaý kerek», dedi Prezıdent.
Memleket basshysy Astanany abattandyrý isindegi oń ózgeristerge toqtaldy
Qasym-Jomart Toqaevtyń aıtýynsha, «Jańa kelbet» baǵdarlamasy aıasynda bes jyl ishinde shahardyń tarıhı bóligindegi 150 ǵımarattyń qasbetin jańartý josparlanyp otyr. Sonymen qatar kósheler abattandyrylady.
«Jalpy, sońǵy eki jylda Astanada kóptegen qoǵamdyq keńistik paıda boldy. Jasyl jelek mol egilip, demalys aımaqtary kóbeıdi.
Bul óte jaqsy. Muny elorda turǵyndary oń baǵalap otyr.
Endi osy aýmaqtardy tıisti deńgeıde saqtaýǵa tıispiz. Bul áýelgi kezekte elordada turatyn jáne shaharǵa qonaqqa keletin Qazaqstan azamattaryna tikeleı baılanysty. Osy isti Ishki ister mınıstrligi, polısııa departamenti jiti baqylaǵany jón», dedi Memleket basshysy.
Qasym-Jomart Toqaev: Astana tek ortalyq kósheleri aınadaı jarqyrap turatyn qala bolmaýǵa tıis
Prezıdenttiń aıtýynsha, shetkeri aýdandarǵa da kóńil bólý kerek. Qalany bezendirý jumystaryna bıýdjetten bólek demeýshiler qarajatyn da tartýǵa bolady.
«Jańa jylda kásipkerlerimizdiń basyn qosýdy josparlap otyrmyn. Olarǵa taǵy da úndeý jasaımyn. Qatań sharalar qabyldaımyn. Túptiń túbinde, Otandy súıý – ortaq borysh.
Sondyqtan oń jaǵalaýdaǵy saýda, ónerkásip oramdary men turǵyn úı alaptaryn jańartý jumystaryn jandandyrǵan jón.
Kóriktendirý máselesi azamattardy árdaıym tolǵandyrady.
Bul – túsinikti, sondyqtan olardyń osylaı aıtýǵa qaqysy bar. Degenmen ákimdik te elorda turǵyndary men qala qonaqtarynan joǵary mádenıetti talap etýi kerek», dedi Memleket basshysy.