Qazaqstan Ulttyq banki jalǵan qujattardy paıdalana otyryp jasalatyn, ıaǵnı teris pıǵyldy adamdardyń óz «ókilettikterin» rastaý úshin «resmı blankilerdiń» nemese «qyzmettik kýálikterdiń» jalǵan túrlerin paıdalanatyn alaıaqtyq jaǵdaılarynyń jıilep ketkenin eskertedi, dep habarlaıdy Egemen.kz.
Teris pıǵyldy adamdar aqshalaı qarajatty jymqyrý maqsatynda messendjerler (WhatsApp nemese Telegram) arqyly azamattarǵa qońyraý shalyp, ózderin Ulttyq banktiń jáne basqa da memlekettik organdardyń qyzmetkerleri retinde tanystyrady. Buǵan qosa, profıliniń shynaıy ekenine adamdardy sendirý úshin messendjerde vedomstvolardyń resmı resýrstaryndaǵy sýretter men emblemalardy paıdalanady, «resmı blankilerdegi» jalǵan qujattardy, ashyq derek kózderinen alynǵan birinshi basshylardyń mórleri men qoldary qoıylǵan anyqtamalardy, qyzmettik kýálikterdi jiberedi.
Qaskóıler jalǵan qujattardy, emosııalardy paıdalanyp, aldaý jáne psıhologııalyq qysym kórsetý arqyly azamattardyń senimine kirip, asyǵys jaǵdaı týdyrady, sodan keıin belgisiz bireýlerdiń kredıt resimdegeli jatqany nemese qazirgi ýaqytta resimdeıtini týraly habarlaıdy. Sonymen qatar, alaıaqtyqtyń aldyn alýǵa nemese «eski kredıtterdi esepten shyǵarýǵa kómektesýdi syltaýrata otyryp, aldanyp qalǵan azamattarǵa mıkrokredıtter nemese qaryzdar resimdeıdi. Bul maqsatta teris pıǵyldy adamdar memlekettik portaldardan ne ekinshi deńgeıdegi bankterden kelip túsken SMS-kodtardy suratady.
Teris pıǵyldy adamdar ózderin Ulttyq banktiń qyzmetkerleri retinde tanystyryp, jalǵan hattar jiberedi, hattarda jiberýshiniń shet tilindegi qujattardy salýyna baılanysty onyń atyna aqsha aýdarýdy toqtata turatyny týraly habarlaıdy jáne olar osy «aýdarylatyn aqshany» alý úshin qujattardyń resmı aýdarý aqysyn tóleýdi usynady, aqsha aýdarylǵannan keıin keri qaıtarylady dep sendiredi.
Osy aıtylǵandardy eskere otyryp, Ulttyq bank azamattardy qyraǵy bolýǵa, belgisiz tulǵalardan kelip túsken qujattardy jáne qońyraýlardy tekserýge, SMS-kodtardy, jeke jáne derbes derekterdi jibermeýge, sondaı-aq úshinshi tulǵalarǵa aqsha aýdarmaýǵa shaqyrady.
Ulttyq bank qyzmetkerleri aýdıo jáne beıneqońyraýlar shalmaıtynyn, jeke tulǵalardyń shottaryna qyzmet kórsetpeıtinin, túrli ınvestısııalyq paı qorlary men qarjy ónimderine qarjylyq salym salýdy usynbaıtynyn, aqshalaı qarajatty saqtandyrýmen aınalyspaıtynyn, sondaı-aq halyqpen aqshalaı esep aıyrysý júrgizbeıtinin eske saldy.