Sharaına
Nıgerııada bes adamdy mert etip, jıyrmaǵa jýyq turǵyndy jaraqattaǵan terrorlyq áreketti jeti jastaǵy qyz bala jasaǵan. Qaıǵyly jaǵdaı Potıským bazarynda bolypty.
«Frans-press» aqparat agenttiginiń habarlaýynsha, bazarǵa kirer kezde kúzetshiler qyzdan tekserýden ótýdi suraǵan. Sol sátte ol jarylǵysh zatty iske qosqan. Bul terrorlyq áreketti eshqandaı uıym óz jaýapkershiligine áli alǵan joq. Degenmen, Nıgerııa bıligi adam ólimine soqtyrǵan atalǵan áreketke «Boka haram» radıkaldy tobynyń qatysy bar bolýy múmkin degen boljam jasap otyr. Osydan bir aptadaı ýaqyt buryn osy elde bir jasóspirim qyz avtobýsta jarylys jasap, sonyń saldarynan 16 adam qaza tapqanyn aıta keteıik.
Parom apatynyń saldary aýyr
Bangladesh aýmaǵynda jolaýshylar paromynyń apatqa ushyraýy saldarynan 60-tan astam adam opat boldy. Oqıǵa Padma ózeninde oryn alǵan.
Aqparat quraldarynyń jazýyna qaraǵanda, parom ózende qarsy kele atqan traýlermen soqtyǵyp, aýdarylyp ketipti. Onda 150-den astam jolaýshy bolǵan eken. Kóz jumǵandardyń kópshiligi áıelder men balalar sııaqty. El bıligi bolǵan jaǵdaıdy tekserýdi birden qolǵa alǵan. Parommen soqtyǵysqan traýlerdiń kapıtany men eki komanda múshesi tutqyndaldy. Atap óteıik, bul elde osyndaı apattar jıi oryn alady. Sebebi, Bangladesh aýmaǵyn eki júzge jýyq ózen basyp ótedi.
Sodyrlar 10 myń kitapty órtep jiberdi
«Islam memleketi» toptarynyń sodyrlary Iraktyń Mosýl qalasyndaǵy ortalyq kitaphanany jaryp jiberdi. Sonyń kesirinen 10 myńǵa jýyq kitap janyp ketken.
«Elaf» ınternet-portalynyń habarlaýynsha, jarylystan úsh qabattan turatyn kitaphana ǵımaraty otqa oranǵan. Al kitaphana dırektorynyń aıtýyna qaraǵanda, ıslamshylar kitaphana aýlasynda Irak eliniń mádenı muralary bolyp tabylatyn kitaptar men kóne qoljazbalardy úıip qoıyp órtepti. Joıylǵan basylymdar ishinde mádenıet, tarıh pen fılosofııaǵa qatysty óte sırek kezdesetin kitaptar da bar eken. Anbar provınsııasy keńesiniń múshesi Adal ál-Fahdaýı sońǵy aptalarda radıkaldar birneshe kitaphanany talqandap, olarda saqtalǵan 100 myńnan astam kitapty joıǵanyn atady.
Qysqa qaıyryp aıtqanda:
*Nıjnıı Novgorod (Reseı) qalasynyń turǵyny, 28 jastaǵy Irına Shýtova tórt sábıdi aman-esen dúnıege ákeldi. Sábılerdiń bireýi ul, qalǵany qyz balalar. Nárestelerdiń árqaısysynyń salmaǵy 1,5 kıloǵa jýyq eken.
*Kásipqoı boksshylar Floıd Meıvezer men Mennı Pakıaonyń jekpe-jeginen túsetin tabys 400 mıllıon AQSh dollaryna jetýi múmkin. Bul aqshanyń jartysy eki boksshyǵa beriledi. Boks tarıhynda áli birde-bir boksshy osyndaı kólemde syıaqy alyp kórmepti.
*Ońtústik Sýdanda mektepte emtıhan tapsyryp jatqan kezde sodyrlar 89 oqýshyny urlap ketken. Olardyń eń kishisiniń jasy 13-te sııaqty. Oqıǵany qandaıda bir uıym moıyndaryna alǵan joq.
*Grýzııa prezıdenti Georgıı Margvelashvılı izdeýde júrgen eldiń eks-prezıdenti Mıhaıl Saakashvılıdiń Ýkraına basshysy Petr Poroshenkoǵa keńesshi bolyp taǵaıyndalýy Kıev pen Tbılısı arasyndaǵy qatynastarǵa áser etpeıtinin málimdedi.
Shah kesenesi qaýipsiz jerde
Túrik Respýblıkasy óziniń eli aýmaǵynan tysqary jatqan, strategııalyq nysany retinde sanalatyn Sırııadaǵy Súleımen shah kesenesin qaýipsiz jerge kóshirdi.
Kóshirý operasııasy keshe keshkisin júzege asyryldy. Oǵan Túrkııa qarýly kúshteriniń 39 tankisi men 100-den astam áskerı kóligi, sondaı-aq, 750 áskerıi qatysqan. Sonyń nátıjesinde kesenedegi memlekettik týlar men belgiler jáne dinı joralǵylardy saqtaı otyryp, kesenedegi zırattan úsh tabyt qazylyp alyndy. Budan bólek, Súleımen shah kesenesin segiz aıdan beri kúzetip kelgen kúreń beretti 44 sarbaz aman-esen eline oraldy. Al qazir kesene Sırııanyń Eshmesı atalatyn eldi mekenine jetkizildi. 1921 jyldyń 20 qazanynda Túrkııa men Fransııa úkimetteriniń kelisimimen Osman ımperııasynyń negizin qalaýshy Osman Gazıdiń atasy Súleımen shah kesenesi jáne oǵan tıesili jer aýmaǵy tolyǵymen Túrkııanyń ıeligi dep tanylǵan bolatyn. Sondyqtan el aýmaǵynan tys jatqan keseneni Túrkııanyń qarýly kúshteri osy kezge deıin saltanatty qaraýyl qoıyp, kúzetip kelgen edi.
Kenshilerdiń barlyǵy qutqaryldy
«Reıter» aqparat agenttigi budan eki kún buryn altyn óndirýshi «Harmony Gold» kompanııasynyń shahtada órt shyǵýyna baılanysty jer astynda qalǵan 486 kenshiniń 287-si qutqarylǵanyn habarlaǵan edi.
Keshegi kúngi derek boıynsha, jer astynda qalǵan kenshilerdiń barlyǵyn ońtústikafrıkalyq qutqarýshylar jer ústine alyp shyqqan. Aldyn ala jasalǵan málimetterge qaraǵanda, kenshilerdiń eshqaısysy jaraqattanbaǵan. Olardyń barlyǵy medısınalyq tekserýden ótetin bolady. Qutqarý operasııasyna jeti qutqarý brıgadasy qatysqan. Qazirgi kezde shahtadaǵy órt tolyǵymen sóndirildi. Iohannesbýrg qalasynan 70 shaqyrymdaı jerdegi shahtadan órt jeksenbi kúni tehnıkalyq jumystar barysynda shyqqan bolatyn. Al órttiń sebep-saldary qazirge anyqtalǵan joq.
Arýnachal-Pradesh kimniń aýmaǵy?
Qytaı úkimeti Úndistan premer-mınıstri Narendra Modıdiń daýly aımaq sanalatyn Arýnachal-Pradesh shtatyna barýyna baılanysty narazylyq notasyn joldady.
Derek kózderine qaraǵanda, resmı Beıjiń bul aımaqty Tıbetke tıesili dep sanaıdy. Al qytaılyq BAQ-tardyń habarlaýynsha, QHR syrtqy ister mınıstrligi osydan birer kún buryn Úndistannyń Qytaıdaǵy elshisin shaqyryp, eger Úndistannyń úkimet basshysy atalǵan aımaqqa baratyn bolsa, Qytaıdyń shekaralyq tutastyǵyn buzǵan bolyp esepteletindigin eskertipti. Alaıda, Narendra Modı buǵan qaramaı, ótken juma kúni Arýnachal-Pradesh aýmaǵyna shtat mártebesi berilgeniniń 28 jyl tolýyna oraı uıymdastyrylǵan sharalarǵa qatysý úshin barǵan. Oqyrmandar esine sala keteıik, osy daýly aımaqqa baılanysty 1962 jyly Qytaı men Úndistan arasynda qarýly qaqtyǵys bolǵan edi.
Internet materıaldary negizinde ázirlendi.