Keıingi eki aı ishinde Astananyń Almaty aýdanynda Bas prokýratýranyń bastamasymen aıryqsha joba qolǵa alynyp, sátti aıaqtaldy. Bul – «Zań men tártip» tujyrymdamasyn iske asyrý aıasyndaǵy «Aıqyn nátıje» jobasy. Mamandardyń aıtýynsha, ol quqyq buzýshylyqtardyń aldyn alýda tıimdiligin kórsetip, zańdy belshesinen basý faktorlaryn joıýǵa septigin tıgizgen.
Bas prokýratýranyń úılestirýimen eki aı boıy qoǵamdyq oryndardaǵy qylmys pen quqyq buzýshylyqqa qarsy is-qımyl jasaý maqsatynda uıymdastyrýshylyq jáne tájirıbelik sharalar qabyldandy. Ol úshin dron arqyly qoǵamdyq tártiptiń saqtalýyn baqylaýdan bastap, kóshe qylmystaryn boljaý úshin jasandy ıntellektini qoldanýǵa deıingi dástúrden tys tásilder synnan ótkizildi. Nátıjesinde, bul keshendi bastamalar elordanyń Almaty aýdanyndaǵy krımınogendik ahýaldyń jaqsarýyna oń áserin tıgizdi.
Atap aıtqanda, kóshedegi qylmystar 32%-ǵa tómendep, onyń ishinde qasaqana aýyr, ortasha jáne jeńil dárejedegi dene jaraqattaryn keltirý derekteri tıisinshe 50%, 38% jáne 37%-ǵa azaıǵan. Sondaı-aq urlyqtar 23%-ǵa, buzaqylyq 100%-ǵa, adam óltirý qylmystary 66%-ǵa qysqarǵany belgili bolyp otyr. Al qylmystardyń jalpy ashylý deńgeıi 14%-ǵa artty.
Qanatqaqty jobanyń nátıjeleri Bas prokýratýrada ótken keńeste talqylanyp, qadaǵalaý organynyń basshysy atalǵan jumys modelin búkil el aýmaǵynda qoldana berýdi tapsyrdy. Sonymen qatar jobany tıimdi engizgeni úshin Astana qalasynyń Almaty aýdany prokýratýrasynyń, ákimdiginiń jáne polısııasynyń birqatar qyzmetkeri Bas prokýrordyń buıryǵymen marapattaldy.
Buǵan qosa, taıaý kúnderi Astana qalasynda prokýratýranyń uıymdastyrýymen «Qamqorlyq pen Zań» jobasy ótkenin aıta keteıik. 26 jeltoqsanda elordanyń Saryarqa aýdandyq prokýratýrasynyń bastamasymen qosymsha qajettilikteri bar adamdardyń qatysýymen sporttyq is-shara ótkizildi. Sporttyq jarys barysynda qatysýshylar óz qabiletterin kórsetýge, qoǵamnyń qoldaýyn jáne jarqyn jaǵymdy emosııalardy sezinýge múmkindik aldy. Nátıjesinde, qatysýshylarǵa estelik marapattar men yntalandyrý syılyqtary tabys etildi.