Elimizde keler jyly qaı salada júrgen azamattardyń tabysy artýy múmkin ekenin Eńbek jáne halyqty áleýmettik qorǵaý mınıstrligi málimdedi, dep jazady Egemen.kz.
Keıingi jyldary eńbek naryǵy túbegeıli ózgerip keledi. Tehnologııa damydy, jumys isteý tásili de basqa arnaǵa buryldy. Osyny eskergen memleket 2025 jyly kásibı standarttardy qaıta qarap, jańartty. Nátıjesinde 132 kásibı standart ázirlenip, olar 1,1 myńnan astam mamandyqty qamtydy. Sonyń shamamen 600-i – jumysshy kásipter. Al kásibı standarttar tiziliminde qazir 864 qujat bar, olar 4,5 myńnan asa mamandyqqa qoldanylady.
Jańartý kezinde basty nazar naqty eńbekke qajet kásipterge aýdaryldy. Ásirese jumysshy mamandyqtarǵa jáne tehnologııa áserinen ózgergen eńbek mazmunyna basymdyq berildi. Generatıvti jasandy ıntellekt pen jańa sıfrlyq sheshimder kóptegen salanyń ishki qurylymyn ózgertti. Sol sebepti burynǵy talaptar qaıta qaralyp, qazirgi naryqqa beıimdeldi.
Suranysqa ıe jańa mamandyqtardyń qatarynda vırtýaldy jáne sıfrlyq jobalaýmen aınalysatyn BIM-mamandar, ushqyshsyz ushý apparattarynyń operatorlary, sondaı-aq kıberqaýipsizdik ınspektorlary bar. Bul baǵyttardyń barlyǵy sıfrlandyrý men óndiristegi avtomattandyrýǵa tikeleı baılanysty.
Mınıstrliktiń málimetinshe, tehnologııa óndiristi óte jyldam ózgertýde, al kadr daıarlaý júıesi soǵan ilesý úshin jańasha baǵdardy qajet etedi. Osy turǵydan kásibı standarttar eńbek naryǵy men bilim berý júıesi úshin naqty baǵyt kórsetetin quralǵa aınalyp otyr. Olar maman biliktiligine degen senimdi arttyryp, turaqty ekonomıkalyq ósimge negiz bolady.
Kásibı standarttardy ázirleý jáne qaıta qaraý jumysyna 50-den astam salalyq keńes qatysyp otyr. Bul keńesterdiń quramynda 900-den asa sarapshy bar. Olardyń ishinde memlekettik organdardyń ókilderi, bıznes, salalyq birlestikter men bilim berý uıymdarynyń mamandary bar.
Aldaǵy jyldary memleket suranysqa ıe mamandyqtardy kásibı standarttarmen 100 paıyz qamtýdy josparlap otyr. Eń joǵary kadr qajettiligi ónerkásipte, qurylysta, aýyl sharýashylyǵynda jáne kólik salasynda kútiledi. Dál osy salalarda jumys isteıtinder úshin 2026 jyl tabys turǵysynan múmkindikke toly bolmaq.
2030 jyldan bastap kásibı standarttardy eńbek qatynastarynda qoldaný mindetti bolady. Osyǵan baılanysty eski biliktilik anyqtamalyqtarynan jańa júıege birtindep kóshý kózdelip otyr. Negizgi maqsat – jumys berýshi men qyzmetkerge artyq qıyndyq týdyrmaı, talaptardy kezeń-kezeńimen engizý.