«Mundaı pikirlerden habarym bar. Onyń bárin durys túsinbeýshilik nemese keıbir «aram oıly» adamdardyń bos áńgimesi dep sanaımyn. Sybaılas jemqorlyqqa qarsy is-qımyl agenttigi derbes memlekettik organ retinde ózine júktelgen mindetti tabysty oryndady. Oǵan kiná arta almaımyz», dedi Qasym-Jomart Toqaev.
Memleket basshysy buǵan deıin Antıkor men Ulttyq qaýipsizdik komıtetiniń (UQK) fýnksııalary bir-birin qaıtalap kelgenin, bul jumys sapasyna keri áser etkenin atap ótti.
«Ulttyq qaýipsizdik komıteti de jemqorlyqpen kúresedi. Eki mekemeniń bir mindetti qabattasa atqarýy memlekettik mańyzy bar jumysqa kesirin tıgize bastady. Qabyldanǵan sheshim qatardaǵy jemqorlardy ǵana emes, qylmystyń ıdeologtary men uıymdastyrýshylaryn da jaýapqa tartýǵa múmkindik beredi», dedi Qasym-Jomart Toqaev.
Jańa reforma boıynsha, jemqorlyqqa qarsy kúres tek jazalaýmen shektelmeıdi. Endi aǵartý jáne túsindirý jumystaryna Memlekettik qyzmet isteri agenttigi jaýapty bolady.
«Jemqorlyqtan aýlaq bolý qajettigin balalardyń qulaǵyna jastaıynan quıa bergen jón. Bul jerde mektepter, qoǵamdyq uıymdar, ásirese ata-analar sheshýshi ról atqarýǵa tıis. Sol kezde elimizde jemqorlyqqa múldem tózbeý mádenıeti qalyptasady», dep tolyqtyrdy Prezıdent.
Memleket basshysy UQK-nyń aldyna naqty talap qoıdy: quzyrly organ san qýalamaı, sapaǵa mán berýi kerek. Bul memlekettik qyzmetshilerdiń únemi jaltaqtap júrmeı, batyl jumys isteýine múmkindik beredi.
«Sybaılas jemqorlyqpen barlyq deńgeıde kúresý memlekettik saıasattyń basym baǵyty bolyp qala beredi. Buǵan qatysty eshqandaı kúmán týmaýǵa tıis», dedi Memleket basshysy.