Otbasy bank servısterinde baıqalǵan ýaqytsha tehnıkalyq aqaýlar Almatydan Astanaǵa derekterdi óńdeý ortalyǵyn kóshirý jumystaryna baılanysty bolǵan, dep jazady Egemen.kz.
Bank málimetinshe, 2025 jyldyń 31 jeltoqsany men 2026 jyldyń 2 qańtary aralyǵynda qarjy jylyn jabý rásimderi júrgizilgen. Al 3 qańtar kúni saǵat 03:00-de negizgi derekterdi óńdeý ortalyǵynyń esepteý qýattaryn kóshirý boıynsha josparly tehnıkalyq jumystar bastalǵan. Mundaı jumystar servısterdiń toqtap qalýyn barynsha azaıtý úshin demalys kúnderine ádeıi josparlanǵan.
Kóshirý aıasynda 40 server, 10 derekterdi saqtaý júıesi, 6 jelilik qurylǵy jáne 10 tehnologııalyq jabdyq sóresi Astanaǵa jetkizilgen. Jabdyqtardy tasymaldaý jumystaryn bank qyzmetkerleri óz kúshimen atqarǵan. Merdiger kompanııalar tartylmaǵan, bul shyǵyndardy ońtaılandyrý jáne qarajatty únemdeý maqsatynda jasalǵan.
Sýyq mezgilde jetkizilgen serverlik jáne dıskilik jabdyqtar aldymen arnaıy oryndarǵa ornalastyrylyp, normatıvtik temperatýralyq rejımge jetkennen keıin ǵana montajdaý jumystary bastalǵan. Iske qosý kezeń-kezeńimen júrgizilip, árbir júıe boıynsha qosylymnyń durystyǵy, jumys turaqtylyǵy jáne derekterdiń tutastyǵy muqııat tekserilgen.
Bastapqy jospar boıynsha barlyq júıe 5 qańtar kúni saǵat 09:00-ge deıin tolyq iske qosylýy tıis bolǵan. Alaıda qosymsha baptaý men tekserý qajettiligine baılanysty bul prosess uzartylǵan. 5 qańtar saǵat 15:00-degi jaǵdaı boıynsha Colvir avtomattandyrylǵan banktik aqparattyq júıesi, tólem júıeleri, BPM, BPM 2.0, CRM, 300 nómiri arqyly kiris qońyraýlaryn óńdeý júıesi jáne birqatar negizgi ishki aqparattyq júıe qaıta iske qosylǵan.
Qazirgi ýaqytta sıfrlyq qyzmet kórsetý arnalary kezeń-kezeńimen qalpyna keltirilip jatyr. Bank barlyq mańyzdy aqparattyq júıeni tolyq iske qosyp, qalypty jumys rejımine kóshý josparyn jalǵastyrýda. Júıelerdiń jumys qabileti turaqty baqylaýda, derekterdiń joǵalýy nemese aqparattyq qaýipsizdikke qatysty eleýli táýekelder tirkelmegen.
Sonymen qatar bank klıentterine qatysty jeńildik sharalaryn da qarastyrǵan. 2026 jyldyń 1–6 qańtary aralyǵyna josparlanǵan kredıttik tólemderdi 7 qańtar saǵat 20:00-ge deıin tóleýge múmkindik berilgen. Bul tólemder merzimi ótken bereshek retinde eseptelmeıdi, ósimpul salynbaıdy jáne aqparat kredıttik bıýrolarǵa jiberilmeıdi.