«Jas daryn» mektebiniń bir top oqýshysy jetim jáne qamqorlyqsyz qalǵan balalarǵa qosymsha sabaq úıretip, bilimde ilgeri basýlaryna kómektesip júr. Qamkóńil ul-qyzdardyń jandaryna jylýlyq syılaǵan joba 2021 jyldan turaqty jalǵasyp keledi.
Halqymyz «Jetim kórseń, jebeı júr», dep beker aıtpaǵan. Taǵdyr talqysyna erte túsken jetim balalardyń kóńilin aýlap, janyna demeý berý, qamqorlyq kórsetý – ıgi is.
Osydan tórt jyl buryn Pavlodar qalasyndaǵy «Jas daryn» mamandandyrylǵan mektep-lıseıi «Oqýshydan-oqýshyǵa» degen bilim jobasyn bastap, ol búginde óńirdegi nátıjeli bastamanyń birine aınalyp úlgerdi. Qazirgi ýaqytta jas daryndyq 23 oqýshy «Kenjekól otbasylyq úlgidegi balalar aýylynda» tárbıelenip jatqan jetim jáne ata-ana qamqorlyǵynsyz qalǵan balalarǵa bos ýaqyttarynda qosymsha sabaq úıretedi. Onyń arqasynda balalar úıinde turatyn jasóspirimderdiń mekteptegi sabaqtary durystalyp, táýir baǵalar ala bastaǵan. Tipti olardyń aldy oblys ortalyǵyndaǵy daryndy balalarǵa arnalǵan mektepterge aýysyp, oqı bastaǵan.
– Otbasylyq úlgidegi aýylymyzda 70 balany tárbıelep otyrmyz. Olar kádimgi mektepterde bilim alady. Biraq bilimderin qosymsha jetildirý úshin repetıtor jaldaýǵa bizde qarajat joq. Bizdi bul qıyndyqtan daryndy balalar qutqaryp otyr. Atap aıtqanda, 23 balamyz «Oqýshydan – oqýshyǵa» jobasynyń ıgiligin kórip otyr. Olar matematıka, aǵylshyn, Qazaqstan tarıhy, bıologııa sııaqty negizgi pánderden qosymsha sabaqtar alady, túsinbegen taqyryptaryn naqtylaıdy. Tıimdi ádistiń arqasynda bilimniń sapasy kóterilip kele jatyr. Tórt jyl ishinde bizdiń tárbıelenýshiler kóp nátıjege qol jetkizdi. Eń áýeli 14 balamyz búginde Pavlodardaǵy daryndy oqýshylarǵa arnalǵan mektepte oqıdy. Bir túlegimiz Kaspıı ýnıversıtetiniń bilim grantyn ıelendi. Bala men bala sóıleskende sabaqtyń jeńil qabyldanatynyn baıqaımyz. Tárbıelenýshilerimizge tegin qosymsha bilim usynyp otyrǵan lıseı oqýshylaryna alǵysymyz sheksiz! – deıdi Kenjekól aýylyndaǵy balalar aýylynyń basshysy Aıjan Shamǵalıeva.
Negizi bul ıdeıanyń avtory – «Jas daryn» mamandandyrylǵan mektep-lıseıiniń dırektory Gúlnar Janǵazy. Alǵashqyda bul iske 7–8 oqýshyny jumyldyryp, tıimdilin baıqaǵan soń qosymsha bilim berýge yntaly ózge daryndy balalardy tarta bastaǵan.
– 2021 jyly mektebimiz ben balalar aýyly arasynda arnaıy memorandým qabyldadyq. Oqýshylarymyz úıretetin qosymsha bilim tegin ári onlaın túrde ótedi. Bizdiń mektepte daryndy balalar jetkilikti. Olardyń áleýetin jetim balalardy damytýǵa baǵyttasaq, odan utylmaıtynymyzdy bildim. Oqýshylar alǵashqyda mundaı balalar aýyly baryn bilmeıtin. Jetim balalardyń taǵdyrlary týraly aıtqanymyzda, oqýshylarymyzdyń boıynda janashyrlyq sezimderi oıandy. Keıin mundaı jobanyń bar ekenin ata-analarǵa habardar ettik. Eresekter balalarynyń ıgi ispen aınalysyp júrgenderin estigende kózderine jas alyp, qatty tolqydy. Keıin tipti olardyń qosymsha sabaqtardy turaqty ótkizýlerin qadaǵalaı bastady. Balalary sabaq ótkizer aldynda bólmelerin jıystyryp, ádemi kıimderin kıip, ózderin eresek adamdarsha ustaıtyndaryn aıtyp keledi ata-analary. Munyń barlyǵy bizdi qýantady, – deıdi mektep basshysy.
Qazirgi ýaqytta «Jas daryn» boıynsha 8–11-synyptardaǵy oqýshylar bul ispen turaqty shuǵyldana bastaǵan. Aıtýlarynsha, balalar úıindegi tárbıelenýshiler kóbine qıyn taqyryptardy meńgerý úshin, bólim boıynsha jıyntyq baǵalaýlar kezinde jıi habarlasady eken. Sóıtip, ekeýara ýaqytyn kelisip, sabaqty onlaın túrde ótkizedi.
– 11-synypta oqyp jatyrmyn. Sofııa esimdi 10-synyp oqýshysyna bos ýaqytymda bıologııadan qosymsha sabaqtar ótkizemin. Sofııa alda ótetin taqyryptar týraly, qandaı ýnıversıtetterge túsýge bolatynyn kóp suraıdy. Keıde ózim bilmeıtin tustarymdy osyndaı sabaqtar arqyly qaıtadan zerttep alamyn. Ata-anam meni únemi qoldaıdy. Olar bul isimniń eki jaqqa da paıdaly ekenin jaqsy túsinedi, – deıdi daryndy jas Aldııar Túmenbaev.
Al 11-synyptyń taǵy bir oqýshysy Nuraıym Janǵazy balalar aýylynda turatyn Artem Gerasımchýkke aǵylshyn tilinen kómektesip júr. Aıtýynsha, Artem aǵylshynsha tilin syndyryp, ájeptáýir úırenip qalǵan. Mektepte úzdik baǵalar alyp júrgenin aıtyp maqtanady.
– Bul meniń óz yntam. О́zge balalarmen tez til tabysa alamyn. Kenjekóldegi balalar úıinde birneshe márte bolyp, Artemmen kezdestim. Onyń úırenýge degen yntasy bar. О́te sypaıy, meıirimdi bala. Armany kóp, fýtbol oınaǵandy unatady, – deıdi Nuraıym.
Oqýshy qyz bos ýaqytynda mýzyka tyńdap, bı bılegendi unatady. О́z synyptastary arasynda balalar úıine qamqor bolyp júrgen qurby-qurdastary barshylyq ekenin jetkizdi.
Balalar aýylynyń tárbıelenýshisi Alvına Mıronova jas daryndyqtarǵa alǵysy sheksiz ekenin aıtady. Ol aǵylshyn tilinen sabaqtar úırenip, kúndeliginde bestikter paıda bola bastaǵan.
Al Andreı Golovanov ınformatıkadan, Artýr Shkrebes matematıkadan oqý úlgerimderi kóterilip qalǵandaryn jetkizdi.
«Jas daryn» mektebiniń ustazdary men ata-analar qaýymy Kenjekól balalar aýyly tárbıelenýshileriniń tilekterine únemi nazar aýdaryp, Naýryz jáne Jańa jyl merekelerinde syılyqtar jasaıdy. Máselen bıylǵy Jańa jylda 6 balanyń Aıaz ataǵa jazǵan haty «Jas darynnyń» jomart jandaryna tap bolypty. Mereke qarsańynda jetkinshekter olardyń tarapynan mol syılyqqa kenelip, kóńilderi jarqyraı tústi.
Atap óterligi, 2024 jyly Qamqorshylar kúnine oraı «Jas darynnyń» belsendi oqýshylary saýapty isteri úshin Pavlodar oblysy ákiminen Alǵyshat alǵan.
Pavlodar oblysy