Qostanaı oblysyna saparmen barǵan Májilis depýtattary, «Amanat» partııasy fraksııasynyń músheleri Albert Raý, Ekaterına Smyshlıaeva jáne Erkin Ábil «Sıfrlyq memleket: óńirlik aspekt» atty dóńgelek ústelge qatysyp, óńirdegi adamdardyń turmys sapasyna tikeleı áser etetin agroónerkásiptik keshenderde, ónerkásipte, densaýlyq saqtaýda, bilim berý jáne baılanys salasynda sıfrly sheshimder engizý baǵytyndaǵy jumystardy talqylady.
Jıynda Májilis tóraǵasynyń orynbasary Albert Raý elimizdiń sıfrlandyrý deńgeıi boıynsha álemde kóshbasshy orynǵa ıe ekenine nazar aýdardy.
– Sıfrlandyrý – memlekettiń strategııalyq baǵyty. Byltyr Májilis jasandy ıntellekt týraly zań qabyldady, ol JI tehnologııalaryn jaýapkershilikpen ári qaýipsiz qoldanýdyń negizin qalady. Memleket basshysy Qasym-Jomart Toqaev óziniń suhbatynda aıtqandaı, elimiz sıfrlyq derjavaǵa aınalýǵa tıis. Sondyqtan Prezıdent 2026 jyldy Sıfrlandyrý jáne jasandy ıntellekt jyly dep jarııalady, – dep atap ótti Májilistiń vıse-spıkeri.
Jumys sapary aıasynda depýtattar qalalyq emhanaǵa baryp, sıfrlyq quraldardyń jumysymen tanysty.
Májilistiń vıse-spıkeri, «Aq jol» partııasy fraksııasynyń múshesi Danııa Espaeva jáne «Amanat» partııasy fraksııasynyń depýtaty Qazybek Álishev Aqtóbe qalasyndaǵy gofroqaptama jáne streıch-plenka óndirýdi jolǵa qoıǵan, óńirdegi mańyzdy ónerkásiptik jobalardyń biri «Capital Plast KZ» ujymymen kezdesip, ónerkásip salasyn damytý jáne jańa jumys oryndaryn qurý máselelerin talqylady.
Ujym aldynda sóz sóılegen Májilis depýtaty Qazybek Álishev óńdeýshi ónerkásipti damytý men ınvestorlardy qoldaý memlekettik saıasattyń basty basymdyqtary bolyp qala beretinin atap ótti. Ol «Amanat» partııasynyń saılaýaldy baǵdarlamasyn oryndaý aıasynda keıingi úsh jylda Aqtóbe oblysynyń ónerkásip sektorynda turaqty ósim bar ekenin eske saldy. Atap aıtqanda, jalpy somasy 105 mlrd teńgeden asa 20 ónerkásiptik nysan iske qosyldy. Bul shamamen 2,3 myń jańa jumys ornyn qurýǵa múmkindik berdi.
Al «Aq jol» demokratııalyq partııasynyń tóraǵasy Azat Perýashev Qaraǵandy oblysynda, óńirdegi birqatar kásiporyndy aralap, kezdesýler ótkizdi.
Turmystyq hımııa men jýǵysh zattar óndiretin «WEC Trade» JShS-da bas dırektor Vıacheslav Soı óndiris úderisimen, shyǵarylatyn ónim túrlerimen tanystyryp, kásiporyn men salanyń damýyndaǵy ózekti máseleler týraly baıandady. Byltyr jyl sońynda «Qazaqstannyń úzdik taýary – 2025» Ulttyq kórmesinde «Halyqqa arnalǵan úzdik taýar» ataǵyna ıe bolǵan kompanııanyń tehnologteri belgili ıtalııalyq mamandarmen tabysty yntymaqtastyq ornatyp, avtorlyq reseptýralar ázirlep jatyr eken. Sondaı-aq Procter&Gamble, Henkel jáne basqa da halyqaralyq kóshbasshylarmen ishki naryqta básekeles bolýdy maqsat etip otyr.
«Aqjoldyqtar» bir aı buryn iske qosylǵan «Kaz UnionPlast» polıetılen qubyrlary zaýyty» men «SSS-Kabel»-diń de jumysymen tanysty. Kásiporyn aksıoneri Bolat Jumambaev pen seriktestik basshylary Bahtııar Abınov pen Bıjigit Qaıyrjan óndiristi uıymdastyrý barysy men osy jylǵa arnalǵan josparlar týraly aıtyp berdi. Olardyń aıtýlarynsha, óndiriletin ónimge suranystyń joǵary bolýyna baılanysty, óndiristi keńeıtý josparlary da bar.
A.Perýashev áıgili Qarmet kompanııasynda Qazaqstandaǵy eń iri taý-ken metallýrgııa kombınaty basqarma tóraǵasynyń birinshi orynbasary Syrym Semeıbaevpen kezdesti. Syrym Saıranbekuly kásiporyndy aýqymdy jańǵyrtý barysyn, aldaǵy damý josparlaryn, ónim túrlerin keńeıtý jáne iri mashına jasaý zaýyttarymen ózara is-qımyl týraly, sondaı-aq Temirtaýda ónerkásiptik klaster qurý jobasy jaıly áńgimeledi. Onyń aıtýynsha, joba lokalızasııany tereńdetýge, shaǵyn jáne orta bıznesti qoldaýǵa jáne eldegi eń iri metallýrgııalyq kásiporynnyń aınalasynda ónerkásiptik kooperasııa qalyptastyrýǵa baǵyttalǵan. Sodan soń Májilis depýtaty shaǵyn jáne orta bıznes ókilderimen kezdesti.
Májilis depýtaty Erbolat Saýryqov Jetisý oblysyna jumys saparymen baryp, Taldyqorǵan qalasyndaǵy 18404 áskerı bólimi – 37-desanttyq-shabýyldaý brıgadasynyń qyzmetimen tanysty. Munda jyl saıyn 30-dan asa taktıkalyq jáne arnaıy oqý-jattyǵý jıyndary ótkizilip, 500-ge jýyq parashıýtpen sekirý júzege asyrylady. Kezdesý barysynda E.Saýryqov Qarýly kúshterdiń jaýyngerlik qabiletin odan ári shyńdaý, áskerı qyzmetshiler men olardyń otbasy músheleriniń áleýmettik jaǵdaıyn jaqsartý, baspanamen qamtamasyz etý, medısınalyq jáne áleýmettik kepildikterdi kúsheıtý máseleleriniń mańyzyna toqtaldy. Depýtat osy problemalardy sheshýge zańnamalyq deńgeıde qoldaý kórsetý Parlamenttiń basym mindetteriniń biri ekenin atap ótti.
Májilis depýtattary, «Amanat» partııasy fraksııasynyń músheleri Rýslan Qojasbaev pen Bolat Kerimbek Jetisý óńirine sapary aıasynda Taldyqorǵan qalasyndaǵy birqatar strategııalyq mańyzy bar óndiris ornynyń qyzmetimen tanysty. Sapar barysynda óńirdiń ındýstrııalyq áleýeti, ınvestısııalyq jobalardyń júzege asý barysy jáne jańa jumys oryndaryn qurý máseleleri talqylandy.
Depýtattar nazar aýdarǵan kásiporyndardyń biri – «Taldyqorǵan Kabel». 2018 jyldan beri elektr symdary men kabel ónimderin shyǵaratyn zaýytta 200 adam turaqty jumyspen qamtylǵan. О́ndiris orny ishki naryqty otandyq ónimmen qamtamasyz etýge jáne óńirdiń ónerkásiptik áleýetin arttyrýǵa aıtarlyqtaı úles qosyp otyr. Nysannyń jumys barysymen tanysý kezinde «Amanat» partııasy fraksııasynyń múshesi Bolat Kerimbek óndiristiń el ekonomıkasy úshin mańyzyn atap ótti. Al Májilis depýtaty Rýslan Qojasbaevtyń aıtýynsha, óndiristik ınfraqurylymdy damytý – óńirlik ósimniń negizgi faktorlarynyń biri.