Premer-mınıstrdiń birinshi orynbasary Roman Sklıar «Xinfa Group» basqarma tóraǵasynyń orynbasary Chjao Tınıýnmen Qazaqstan aýmaǵynda zamanaýı ónerkásiptik park qurylysynyń ınvestısııalyq ózara is-qımyl jáne praktıkalyq aspektileri máseleleri boıynsha kezdesý ótkizdi.
«Xinfa Group» – sıngapýrlyq kompanııa, energetıka, alıýmınıı, hımııa ónerkásibi, sondaı-aq ekologııalyq qurylys pen agrarlyq tehnologııalar salasynda ártaraptandyrylǵan portfeli bar álemdegi eń iri ındýstrııalyq holdıngterdiń biri. Kompanııa 1972 jyly qurylǵan ári birneshe negizgi óndiristik baǵyttarda jahandyq kóshbasshylyq pozısııalarǵa ıe.
Pavlodar oblysynda tolyq sıkldi aýqymdy ónerkásiptik park qurý jónindegi ınvestısııalyq jobanyń tujyrymdamasy kómirden, boksıtterden, mystan, flıýorıt pen áktastan joǵary qaıta bólý ónimderin shyǵarý maqsatynda shıkizatty tereń óńdeýdi kózdeıdi. Atap aıtqanda, alıýmınıı, alıýmınıı men mys óndirý boıynsha metallýrgııa óndiristerin salý, jańartylatyn energııa kózderi bazasyndaǵy nysandardy qosa alǵanda, energetıkalyq ınfraqurylymdy qalyptastyrý, sondaı-aq soda, kómirtekti materıaldar men ekologııalyq qurylys sheshimderi óndiretin kásiporyndardy iske qosý josparlanyp jatyr. Investısııalardyń jıyntyq kólemi shamamen 15 mlrd dollar deńgeıinde baǵalanady, bolashaq ındýstrııalyq parktiń aýdany – 3 myń gektardan astam.
«Xinfa Group» basqarma tóraǵasynyń orynbasary Chjao Tınıýn kompanııa boksıt, kómir men mys ken oryndaryn qosa alǵanda, elimizdiń resýrstyq bazasyna aldyn ala taldaý júrgizgenin ári tereń óńdeý tizbegin qalyptastyrý men qosylǵan quny joǵary ónim shyǵarý kontekstinde olardyń ónerkásiptik áleýetin oń baǵalaıtynyn atap ótti.
Roman Sklıar Prezıdent Qasym-Jomart Toqaevtyń baǵytyna súıene otyryp, ónerkásiptik jańǵyrtýdy, strategııalyq ınvestısııalardy tartýdy ári tehnologııalyq ındýstrııany damytýdy memlekettik ekonomıkalyq saıasattyń negizgi basymdyqtary retinde qarastyratynyn aıtty. Úkimet halyqaralyq ındýstrııalyq toptarmen uzaqmerzimdi áriptestik tetikterin qosa alǵanda, iri ınvestısııalyq jobalardy súıemeldeý úshin ornyqty quqyqtyq ári ınstıtýsıonaldyq baza qalyptastyrdy.
Kezdesý qorytyndysy boıynsha jobany odan ári egjeı-tegjeıli pysyqtaýǵa, ındýstrııalyq áriptestikti keńeıtýge ári uzaqmerzimdi ınvestısııalyq yntymaqtastyqty nyǵaıtýǵa múddelilik rastaldy.