Orny bólek ortalyq

Parlament Senaty men Májili­siniń depýtattary Naýryzbaı Baı­qadamov, Rýslan Rústemov, Murat Ábenov, Marhabat Jaıym­betov, Murat Ergeshbaev, «Qazaqstan halqy­na» qoǵam­dyq qorynyń basqarma tór­aǵasy Lázzat Shyńǵys­baevanyń jáne jurtshy­lyqtyń qatysýymen ótken saltanatty jıynda oblys ákimi Nurlybek Nálibaev salamatty ómir saltyn ustanýdyń mańyzyn atap ótip, jınalǵan qaýymdy jańa nysannyń ashylýymen quttyqtady.

– Bizdiń ár bastamamyz eldiń birliginiń arqasynda júzege asyp keledi. Sonyń dáleli «Qazaqstan halqyna» qorynyń qoldaýymen salynǵan ınklıýzıvti sport ortalyǵy. Jobany iske asyrýǵa 2,9 mlrd teńge bólindi. Munda sportshylarymyzǵa arnal­ǵan voleıbol, kúres, jalpy dene daıyndyǵy zaldary bar. Bir mezette 131 adamnyń sportpen júıeli shuǵyldanýyna múmkindik jasalǵan, – dedi oblys ákimi.

Aımaq basshysy óńirdiń áleýmettik-ekonomıkalyq damýy­na, turǵyndardyń ál-aýqatyn arttyrýǵa qosqan eleýli úlesi úshin Lázzat Shyńǵysbaeva basqaratyn «Qazaqstan halqyna» qory ujymyna Syr jurtshylyǵynyń atynan alǵys aıtty.

Jalpy, «Qazaqstan halqyna» qoǵamdyq qory óńirdegi mańyzdy áleýmettik bastamalarǵa 12 mlrd 851 mln teńge baǵyttaǵan. Sonyń ishinde aýyl mektepteriniń materıaldyq bazasyn nyǵaıtýǵa 5 mlrd teńgeden asa qarjy qaralsa, densaýlyq saq­taý, áleýmettik qorǵaý salalaryn­da 5 mlrd teńgeniń jobalary iske asyrylyp keledi.

Sport ınfraqurylymyn damy­týǵa bólingen 2 mlrd 728 mln teńgege ótken jyly Shıeli, Jalaǵash aýdandarynda jańa sport keshenderi salynyp, paıdalanýǵa berildi. Syrdarııa, Qarmaqshy aýdandaryndaǵy sport nysandary jańa qural-jabdyqtarmen qamtamasyz etildi.

Kásipkerler, ulttyq kompanııalar men sport federasııalary da oblys turǵyndarynyń buqaralyq, kásibı sportpen aınalysýyna múmkindik jasap otyr. Osynyń arqasynda 4 jyldan beri 23 sport nysany, 20 sport kesheni salyndy. «Aýyl – el besigi» baǵdarlamasy aıasynda eldi mekenderde taǵy 4 sport kesheni el ıgiligine tabystalady. Aımaqta alǵash ret erler men áıelderge arnalǵan «Qyzylorda boks klýby» jumysyn bastady. Qazaqstan fýtbol federasııasynyń qoldaýymen Qyzylorda qalasyn­daǵy Ǵanı Muratbaev atyndaǵy stadıon­nyń qosalqy alańy men Jalaǵash aýdanynyń ortalyq stadıony kúrdeli jóndeýden ótip, qoldanysqa berildi. Jergilikti kásipkerler demeýshiligimen 1 mlrd 600 mln teńgege 80 sport-oıyn alańy salyndy.

Oblys ortalyǵyndaǵy iri jobalardyń biri aýmaǵy 25 myń sharshy metrlik «Qyzylorda Arena» kópbeıindi sport kesheni bolyp otyr. Bul nysanda olımpıadalyq standarttarǵa saı 50 metrlik basseın, Azııa, álem chempıonattaryn ótkizýge arnalǵan 2 500 oryndyq zal, olımpıadalyq sport túrlerine arnalǵan jattyǵý zaldary bolady.

Qyzylorda