Ertis-Baıan óńirinde 500-ge jýyq qarııa qarttar úıin panalap otyr. Memlekettik arnaýly áleýmettik qyzmetter kórsetý jónindegi 2 ortalyq, kútimge muqtaj egde jastaǵy adamdarǵa arnalǵan 5 jekemenshik pansıonat jumys isteıdi.
О́ńirlik jumyspen qamtýdy úılestirý jáne áleýmettik baǵdarlamalar basqarmasynyń dereginshe, qarttar men múgedektigi bar adamdarǵa arnalǵan stasıonar jaǵdaıyndaǵy memlekettik ortalyq sany – ekeý. Olar – «Pavlodar oblysynyń jalpy úlgidegi qarttar men múgedektigi bar adamdarǵa arnalǵan arnaýly áleýmettik qyzmet kórsetý ortalyǵy» KMM (268 tósektik oryn) men «Qarttar men múgedektigi bar adamdarǵa arnalǵan jalpy úlgidegi Aqsý arnaýly áleýmettik qyzmetter kórsetý ortalyǵy» KMM (241).
«Qarttar men múgedektigi bar adamdarǵa arnalǵan arnaýly áleýmettik qyzmet kórsetý ortalyqtaryn 497 adam panalap otyr. Olardyń 323-i er, ózgesi áıel adamdar. Pavlodar qalasynda ornalasqan qarttar úıine 4 adam kezekte tur. Aqsýdaǵy mekemede kerisinshe 12 oryn bos tur. Sol turǵyda óńirde qarttar úılerine tapshylyq baıqalmaıdy», deıdi basqarma basshysynyń orynbasary Álııa Rahymova.
Áleýmettik qyzmet kórsetý júıesin transformasııalaý sheńberinde byltyrdan bastap elimizde arnaýly áleýmettik qyzmetter kórsetý salasynda arnaıy áleýmettik qyzmetter kórsetetin sýbektilerdi lısenzııalaý, jan basyna shaqqandaǵy qarjylandyrýǵa kóshý sııaqty eleýli ózgerister engizilgen. Áleýmettik kodekske sáıkes, arnaýly áleýmettik qyzmet kórsetetin sýbektiler – arnaýly áleýmettik qyzmet kórsetýge lısenzııa negizinde arnaýly áleýmettik qyzmet kórsetý boıynsha memlekettik jáne memlekettik emes sektorlarda jumys isteıtin jeke jáne zańdy tulǵalar.
«Pavlodar oblysynda búginde stasıonar jaǵdaıynda arnaýly áleýmettik qyzmetter kórsetetin lısenzııalanǵan jeke sýbektiler joq. Biraq aýmaǵymyzda turaqty kútimge muqtaj egde jastaǵy adamdarǵa turmystyq kútim kórsetý jónindegi qyzmetti júzege asyratyn 5 jekemenshik pansıonat jumys isteıdi. Bul uıymdardyń qyzmeti halyqty áleýmettik qorǵaý júıesin retteý, vedomstvolyq baqylaý salasynan tys ornalasqan. Sebebi ondaǵy kútilip jatqan qarııalardyń eńbekke qabiletti balalary bar. Sondaı-aq atalǵan pansıonattardyń arnaýly áleýmettik qyzmetter kórsetýge lısenzııasy joq, arnaýly áleýmettik qyzmetter keshenin usynbaıtyndyqtan, áleýmettik qyzmetterdi jetkizýshiler tizilimine engizilmegen. Soǵan oraı olarǵa bıýdjetten qarjy bólinbeıdi», dep qosty basqarma ókili.
Budan bólek, aımaqta úıde kútim jasaý jaǵdaıyndaǵy qyzmetti 18 uıym, onyń ishinde 13 memlekettik, 5 memlekettik emes sýbekti júzege asyryp otyr.
Byltyr prokýrorlar Aqsý qalasyndaǵy pansıonatta qart adamdardy syrt kıimsiz dalada ustap, azaptaý derekterin anyqtaǵan edi. Jumyspen qamtýdy úılestirý jáne áleýmettik baǵdarlamalar basqarmasynyń aqparynsha, qazir atalǵan ortalyq jumys istemeıdi. Sot kináli tulǵalardy anyqtap, qylmystyq jaýapkershilikke tartqan.
Atap óterligi, bıyl qarttar úılerine bıýdjetten 1 mlrd 667,2 mln teńge bólingen.
Pavlodar oblysy